भांगरभूंय | प्रतिनिधी
जुलय मेरेन अल निनो सक्रीय जावपाची शक्यताय
नवी दिल्ली, खबरां संस्था ः अंदूं भारतांत सामान्य परस उणो पावस पडटलो असो अदमास आसतानाच अल निनो सक्रीय जावपाची शक्यताय आसा. अमेरिकेची हवामान संस्था ‘नॅशनल ओशनिक अँड ॲटमॉस्फेरिक ॲडमिनिस्ट्रेशन’च्या (NOAA) मतान मे ते जुलय ह्या काळांतच अल निनो सक्रीय जावंक शकता.
पॅसिफीक म्हासागरांतलें तापमान नेटान वाडटलें. ही धोक्याची हवामानाची स्थिती हे खेपे पावसाच्या पुराय हंगामांत चालू उरपाची शक्यताय आसा. फाटल्या म्हयन्यांत जारी केल्ल्या अदमासांत ही शक्यताय 61% आशिल्ली जी आतां 82% वाडल्या अशें एनओएएन सांगलां.
हाचो थेट परिणाम मान्सूनच्या पावसाचेर जातलो. जाका लागून देशांत दुकळ पडपाचो धोको आनीक वाडटलो अशें भारतीय हवामान खात्याचे मुखेली मृत्युंजय महापात्रा हांणी सांगलें.
अल-निनो म्हणल्यार कितें?
अल-निनोक लागून दर्याचें उदक असामान्य प्रमाणांत उश्ण जाता आनी ताका लागून वाऱ्याच्या पद्दतींतय बदल जाता. हाका लागून संवसारभर पावसाचे चक्र इबाडटा. हाका लागून केन्ना खर दुकळ, केन्ना व्हड पावस आनी जाल्यार केन्ना हुंवार येता. सादे भाशेंत सांगपाचें जाल्यार अल निनो सक्रिय जाता तेन्ना पॅसिफीक म्हासागरांतल्यान भारताकडेन येवपी मान्सून वारें आडायतलो. हाचो परिणाम पावसाचेर जातलो.
अल-निनोची शक्यताय 82% मेरेन वाडली, संवसाराचेर परिणाम
नोआच्या ताज्या अपडेटा प्रमाण, अंदूं मे ते जुलय ह्या काळांत अल निनो विकसित जावपाची 82% शक्यताय आसा. तो गिमा मेरेन (डिसेंबर 2026 ते फेब्रुवारी 2027) चालू उरपाची 96% शक्यताय आसा. जाल्यार, तो ‘स्ट्राँग’ वा ‘व्हेरी स्ट्राँग’ उरपाची सुमार 67% शक्यताय आसा. हाका लागून आतां दुबळो पावस, दुकळ आनी उश्णताय ल्हारां येवपाची शक्यताय वाडल्या.
भारत आनी दक्षीण-पूर्व आशियांत पावस उणो जाता. खर उश्णताय जाणवता.
इंडोनेशिया, उत्तर ऑस्ट्रेलियांत ओलसाण उणी जाल्ल्यान दुकळ येता आनी रानांत उजो लागपाचो धोको वाडटा.
मध्य पॅसिफीक म्हासागरांत दर्याचें तापमान वाडिल्ल्यान व्हड पावस पडटा आनी चक्रीवादळाची परिस्थिती निर्माण जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
