भांगरभूंय | प्रतिनिधी
नवी दिल्ली, खबरां संस्थाः भारतांतल्या शारांनी रावपी 82 टक्के नागरिक मानसीक ताणांत आसात अशी धक्को दिवपी गजाल मुखार आयल्या. संवसारीक मानसीक भलायकेच्या अभ्यासा प्रमाण भारताचो क्रमांक 84 देशांतल्यान 60 वे सुवातेर आसा.
शारांनी रावपी 82 टक्के नागरिकांच्या ताणा फाटलें मुखेल कारण भलायकेक लागून न्हय तर अर्थीक हुस्को आसा हें अभ्यासांत स्पश्ट जालां. ‘इंडिया हेल्थ कोशंट’ संघटनेन हालींच जाहीर केल्ल्या सर्वेक्षणांत भारताचो वट्ट भलायकी निर्देशांक 100 पयकी 65 गुणां सयत बऱ्या वर्गांत दाखयला. पूण ह्या सकारात्मक चित्रा फाटल्यान एक चिंतेची गजाल उजवाडाक आयल्या. शारांतल्या 82 टक्के भारतीयांनी आपूण खर मानसीक ताणांत आशिल्ल्याचे मान्य केलां.
सर्वेक्षण कशें जालें?
मणिपालसिग्ना हेल्थ इन्शुरन्स आनी युगोव्ह इंडिया हांणी संयुक्तपणान हें सर्वेक्षण केलां. सर्वेक्षणा प्रमाण शारांनी रावपी जायते नागरिक भलायकेचे नदरेन जागृत आसात. सुमार 67 टक्के लोक बरे भलायके खातीर समतोल आहार घेतात, जाल्यार 64 टक्के नागरिक स्वताक फिट दवरपा खातीर नेमान व्यायाम करतात. पूण तांचे मदीं ताण वाडपाचे प्रमाण खूब चड आशिल्ल्याचें दिसून आयलां. 10 नागरिकां मदल्या सुमार 8 नागरिकांनी आपूण ताणांत आशिल्ल्याचें मान्य केलां. तातुंतल्या सुमार 14 टक्के लोकांनी आपलो ताण नियंत्रणा भायर आसा अशें सांगलां. विशेश म्हणल्यार 25 ते 34 वर्सां पिरायेच्या तरणाट्यां मदीं हें प्रमाण 20 टक्क्यां मेरेन पावलां.
शारांतल्या नागरिकांक नेमको कसलो हुस्को?
गरजेच्या वस्तूंचो वाडत वचपी खर्च, पयशे बचत करपाचो हुस्को, रिणाचो भार आनी फुडल्या अर्थीक सुरक्षे विशीं अनिश्चितताय हाका लागून जायत्या भारतीयांक मानसीक ताण येवपाक लागला अशें सर्वेक्षणांतल्यान स्पश्ट जालां. तरणाट्यां मदीं मानसीक ताणाची पातळी नेटान वाडत आसा. वाडत वचपी भाडें, रिणाचे हप्ते, नोकरीची अनिश्चितताय, परिक्षेची तयारी, जाण्ट्या आवय-बापायची जापसालदारकी आनी स्वताच्या कुटुंबाचे नियोजन ह्या सगळ्या करणांक लागून तरणाट्यांचेर ताण पडटा. अर्थीक दबावाक लागून जावपी ताण वेवस्थापन करप हो तांकां सगळ्यांत व्हडलो हुस्को.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
