भांगरभूंय | प्रतिनिधी
नवी दिल्ली, खबरां संस्था: ऑस्ट्रेलियन पत्रकार अवनी डायसाक भारतांतले वेंचणुकेची कव्हरेज दिवपाची परवानगी नाशिल्ल्यान भारत सोडचो पडलो असो आरोप अवनीन केला. पूण हो दावो फटींग, चुकीचो आनी दिकाभूल करपी अशें अधिकृत सुत्रांनी सांगलें.
ऑस्ट्रेलियन ब्रॉडकास्टिंग कॉर्पोरेशनाची दक्षीण आशिया प्रतिनिधी आशिल्ल्या अवनी डायसान २० एप्रिलाक भारत सोडलो. डायसान आरोप केल्लो, तिला सरकारा कडल्यान व्हिसाची मुदतवाड न्हयकारतले अशें सांगिल्लें. तिका परराष्ट्र मंत्रालयाच्या अधिकार्यान फोनार ह्या निर्णयाची म्हायती दिल्ली. जाल्यार तिणें व्हिसाचे नेम पाळूंक नाशिल्ल्याचें सरकारी सुत्रांनी सांगलें. मात तिचे मागणे प्रमाण तिका आस्वासन दिल्ले प्रमाण सगळे कडेन वेंचणुकांचे कव्हरेजी खातीर तिचो व्हिसा वाडोवपाची शक्यताय आसा.
डायसाचो आदलो व्हिसा २० एप्रील मेरेन वैध आशिल्लो आनी तिणें १८ एप्रीलाक व्हिसा शुल्क भरलें. त्याच दिसा तिचो व्हिसा जून म्हयन्याचे निमाणे मेरेन वाडयल्लो अशें सुत्रांनी सांगलें. पूण, डायसान २० एप्रिलाक भारत सोडपाचें थारायलें. भारत सोडचे पयलीं तिचो वैध व्हिसा आशिल्लो आनी तिची व्हिसा मर्यादा मान्य जाल्ली. वेंचणुको कव्हर करपाक परवानगी नाशिल्ल्याचो तिचो मुद्दोय वस्तुस्थिती प्रमाण चुकीचो आसा, अशें सरकारी सुत्रांचें म्हणणें आसा.
व्हिसा आशिल्ल्या पत्रकारांक भारतांत वेंचणूक कव्हर करपाक मेळटा. फकत वैध अधिकृत पत्रां मेळयले बगर ह्या पत्रकारांक मतदान केंद्रांनी आनी मतमेजणी केंद्रांनी प्रवेश मेळना. पूण व्हिसा वाडोवपाची प्रक्रिया चालू आसतना ताचेर प्रक्रिया करपाक मेळना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
