भांगरभूंय | प्रतिनिधी
पणजी : भायली पेठ, दिवचलच्या श्रीमहापुरुष मठाचो जिर्णोद्धार सुवाळो १८ ऑगस्टाक जातलो. ह्या निमतान सकाळीं अभिशेक, लघु विष्णूयाग अनुश्ठान आनी हेर धर्मीक विधी जातले. सांजेवेळार ७ ते ८.३० वरां मजगतीं परंपरीक घुमट आरती जातल्यो.
कांय दसकां आदीं काशी तिर्थक्षेत्रांतल्यान एक आनी पंढरपूर हांगच्यान दोग अशे मेळून तीग संत म्हापुरुष भोंवडी करीत दिवचले पावले. तांचे भितरलो पंढरपूरचे म्हापुरुष दिवचले रावले जाल्यार हेर दोग जाण दक्षीण भारतांत गेले. दिवचल, बोर्डें हांगा श्रीमहापुरुस मठा पसून १ किलोमिटर अंतराचेर मठाणवाडी नांवाचें एक थळ आसा. थंय व्हड उदकाचो व्हाळ आसा. दिवचले राविल्ल्या म्हापुरसान पंढरपूरच्यान श्रीविठ्ठलाची पाषाणी मुर्त वांगडा हाडिल्ली. ते मुर्तीची सद्याच्या जाग्यार पुजा करून उपरांत ते म्हापुरूष मठाणवाडी व्हाळा वटेन शांत वाठारांत तपश्चर्या/ साधना करपा खातीर वताले.
कांय काळा उपरांत तांणी जिवंत समाधी घेतली. ह्या म्हापुरसान चणेकार कुटुंबियांच्या आठ पिळग्यो आदल्या पुर्वजांच्या सपनांत येवन आपली समाधी नेमकी खंय आसा हें खुणायलें. आपलें समाधी थळ नितळ दवरात, थंय श्रीविठ्ठलाची पुजा करून दिवो- वात लायात अश्योय सुचवण्यो केल्यो. चणेकर कुटुंबियांच्या पुर्वजांनी सपनाचेर विस्वास दवरून समाधीस्थळ नितळ केलें आनी थंय नेमान दिवो लावपाक सुरू केलें. श्रीमहापुरुसाच्या सुक्ष्म रूपाच्या अस्तित्वाची जाणीव आनी प्रचिती आयले उपरांत श्रद्धा आनीक खर जायत गेली, श्रीमहापुरुष आनी श्रीविठ्ठला खातीर भक्तीभाव वाडपाक लागलो.
चणेकरांच्या पुर्वजांनी उपरांत समाधीस्थळ राखून दवरपा खातीर ताचे भोंवतणी फातरांनी बांदकाम केलें. ह्या कामांत जायत्या जाणांनी हात लायलो. तांचीं नांवां पुर्वजांनी शिलालेख रुपांत सांबाळून दवरल्यांत. तशेंच श्रीमहापुरुष मठाचो जिर्णोद्धार करतना चणेकर कुटुंबियांनी मठांतल्या चौखाम्यार लाकडी रचणूक आनी मूळ फातरांचें समाधी स्थळ सांबाळ्ळां.
श्रीमहापुरुष मठ हें स्थळ दिवचलच्या श्रीशांतादुर्गा स्कुलाच्या कुशीक आसा. मठांत महापुरुसाची समाधी आनी श्रीविठ्ठलाची मुर्ती आनी मठा सामकार श्री दत्तमहाराजांचें अस्तित्व दाखोवपी औदुंबराचें झाड आसा. चणेकर कुटूंबीय नेमान हांगा पुजा करतात. फाटल्या वर्सा दसर्याच्या मुर्ताचेर भुमीपूजन करून जिर्णोद्धाराचें काम सुरु केल्लें. आतां जिर्णोद्धार सुवाळ्या उपरांत १८ ऑगस्ट सावन श्रीमहापुरुष मठ भाविकां खातीर उक्तो करतले. ह्या सगळ्या धर्मीक विधींचे पुरयत शरद सावयकार हांच्या मार्गदर्शना खाला करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
