भांगरभूंय | प्रतिनिधी
केंद्रीय मंत्री एल. मुरूगन येतले; संघटणा घटमूट करपाची तयारी
भांगरभूंय । प्रतिनिधी
पणजी: पंदरा दिसां पयलीं आमदार, मंत्र्यांची बसका जाले उपरांत भारतीय जनता पक्षाचे राज्य कार्यकारिणीची बसका शेनवारा 20 जूनाक पणजे जातली. म्हायती प्रसारण राज्यमंत्री एल. मुरूगन हे बसकेक मार्गदर्शन करतले. मुख्यमंत्री डॉ. प्रमोद सावंत, प्रदेशाध्यक्ष दामू नायक, मंत्री, आमदार हांचे सयत राज्य कार्यकारिणीचे वांगडी बसकेक हाजीर आसतले.
मंत्री, आमदारांचे बसके उपरांत मुख्यमंत्री डॉ. प्रमोद सावंत तशेंच प्रदेशाध्यक्ष दामू नायक हे दिल्ली वचून आयल्यात. प्रदेश अध्यक्षान येता ते वेंचणुके खातीरचो रोडमॅप राष्ट्रीय सरचिटणीस बी. एल. संतोष हांकां सादर केला. ते उपरांत आयज राज्य कार्यकारिणी बसका जाता. मंत्री, आमदारांचे कामगिरीचो नियाळ तशेंच वेंचणुकेंत नव्या चेऱ्यांक उमेदवारींत प्राधान्य हे मुद्दे रोडमॅपांत आसात.
राष्ट्रीय अध्यक्ष म्हूण नितीन नबीन हांणी ताबो घेतले उपरांत ही पयलीच राज्य कार्यकारिणीची बसका जाता. केंद्रीय मंत्री एल. मुरूगन हे बसकेक हाजीर रावतले. येता ते वेंचणुके विशीं बसकेंत चर्चा जातलीच. हे भायर हेर बरेच विशय आसात. केंद्रांतल्या भाजप सरकाराक 12 वर्सां पुराय जाल्यात. ह्या 12 वर्सांत केंद्र सरकारान लागू केल्ल्यो येवजण्यो तशेंच हेर कामांची म्हायती लोकां मेरेन पावोवपाची गरज आसा. येता ते वेंचणुकेक लागून गट समित्यो तशेंच हेर सगल्या समित्यांक सक्रीय करपाची गरज आसा. बसकेंत राजकी तशेंच हेर थाराव चर्चेक येतले, अशी म्हायती दामू नायक हांणी दिली. गोविंद पर्वतकार, सिद्धार्थ कुंकळ्येकार हांचे सयत प्रदेश भाजप अध्यक्ष दामू नायक हांणी बसकेचे तयारीचो नियाळ घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
