भाजप पुराय भोवमतान सरकार स्थापन करतलो

भांगरभूंय | प्रतिनिधी

दामू नायक: डबल इंजीन सरकारान खूबशीं विकास कामां केल्यांत

मडगांव: राजकारणांत कितलेशेच फावटी राजकी परिस्थिती प्रमाण निर्णय घेवचे पडटात. काँग्रेसी परस भाजप सरकार खूब बरें आसा हें लोकांक खबर आसा. येता ते वेंचणुकेंत कांय आडवाद सोडीत जाल्यार भाजप पुराय भोवमतान सरकार स्थापन करतलो असो विस्वास भाजप प्रदेशाध्यक्ष दामू नायक हांणी उक्तायलो.

येता ते वेंचणुकेंत काँग्रेस पक्षान सरकार स्थापन करपाचो दावो केला ह्या विशयाचेर उलयतना भाजप प्रदेशाध्यक्ष दामू नायक हांणी सांगलें, गोंयांतल्या डबल इंजीन सरकारान खूबशीं विकास कामां केल्यांत. व्हड प्रमाणांत केंद्रा कडल्यान निधी मंजूर करून घेतला. काँग्रेसीच्या काळांत जाल्ले घोटाळे आनी तांच्या पक्षांत सुरू आशिल्लो वाद आनी हेरूय गजाली लोकांक खबर आसा.

जिल्हो पंचायत वेंचणुकांनी हे सगले मुद्दे आशिल्ले तरी लेगीत लोकांनी भाजपाचेर विस्वास दाखयिल्ल्यान जिल्हो पंचायत वेंचणुकेंत भाजपाक व्हड प्रमाणांत जैत मेळ्ळें. भाजपांत धा टक्के उणें आसल्यार काँग्रेसीचो विचार करीत जाल्यार ही टक्केवारी 90 टक्क्यां मेरेन पावता हें लोकांक बेस बरें खबर आसा. फातरा परस वीट मोव अशे तरेचो हो प्रकार आसा. कांय वेळा राजकी परिस्थिती प्रमाण निर्णय घेवचे पडटात. आदले मुख्यमंत्री मनोहर पर्रीकार हांणी लेगीत तांच्या काळांत राजकी परिस्थिती प्रमाण कांय जाणांक लागीं करून सरकार चलयलें. लोकांच्या विस्वासाचेर आनी कार्यकर्त्यांच्या कामाच्या बळग्यार येता ते वेंचणुकेंत कांय आडवाद सोडीत जाल्यार गोंयांत पुराय भोवमतान भाजपाचें सरकार येतलें असो दावो दामू नायक हांणी केलो.

सरकार चलयतना कांय जापसालदारक्यो घेवच्यो पडटात. कांय जाणांचीं कामां जातात जाल्यार कांय जाणांची जायनात. मागीर ते निरशेतात. पूण भाजप ज्यो गजाली सुदारपाची गरज आसा त्यो नक्कीच सुदारून फुडें पावल घालतलो अशेंय दामू नायक हांणी म्हणलें.

मंत्रीमंडळांत कोणाक घेवप हो निर्णय मुख्यमंत्र्यांचो

–

मंत्रीमंडळांत कोणाक घेवप आनी कोणाक काडप हे विशींचो निर्णय पुरायपणान मुख्यमंत्र्यांचो आसता. पक्षाचे बसकेंत जे प्रमाण हे विशींची चर्चा जाल्या ते प्रमाण मुख्यमंत्री फुडारांत योग्य निर्णय घेतले. पूण मंत्रीमंडळांत कोणाचो आस्पाव करप हो निर्णय पुरायपणान मुख्यमंत्र्यांचो आसा. अशें दामू नायक हांणी सांगलें.