भांगरभूंय | प्रतिनिधी
फाल्यां पणजे राज्य कार्यकारिणी बसका
केंद्रीय मंत्री एल. मुरूगन हांची उपस्थिती
भांगरभूंय । प्रतिनिधी
पणजी: पंदरा दिसां पयलीं आमदार, मंत्र्यांची बसका जाले उपरांत भारतीय जनता पक्षाच्या राज्य कार्यकारिणीची बसका फाल्यां शेनवारा पणजे जाता. म्हायती प्रसारण राज्यमंत्री एल. मुरूगन हे बसकेक मार्गदर्शन करतलें. मुख्यमंत्री डॉ. प्रमोद सावंत, प्रदेशाध्यक्ष दामू नायक, मंत्री, आमदार हांचे सयत राज्य कार्यकारिणीचे वांगडी बसकेक हाजीर आसतलें.
मंत्री, आमदारांच्या बसके उपरांत मुख्यमंत्री डॉ. प्रमोद सावंत तशेंच प्रदेशाध्यक्ष दामू नायक हे दिल्ली वचून आयल्या. प्रदेश अध्यक्षांनी येत्या वेंचणुके खातीरचो रोडमॅप राष्ट्रीय सरचिटणीस बी. एल. संतोष हांकां सादर केला. हे उपरांत फाल्यां राज्य कार्यकारिणी बसका जाता. मंत्री, आमदारांच्या कामगिरीचो नियाळ तशेंच वेंचणुकेंत नव्या चेऱ्यांक उमेदवारींत प्राधान्य हे मुद्दे रोडमॅपात आसा.
राष्ट्रीय अध्यक्ष म्हूण नितीन नबीन हांणी ताबो घेतले उपरांत ही पयलीच राज्य कार्यकारिणीची बसका जाता. केंद्रीय मंत्री एल. मुरूगन हे बसकेक हाजीर रावतलें. येवपी वेंचणुके विशीं बसकेंत चर्चा जातलीच. हे भायर हेर बरेच विशय आसा. केंद्रांतल्या भाजप सरकाराक 12 वर्सां पुराय जाल्या. ह्या 12 वर्सांत केंद्र सरकारान लागू केल्ल्यो येवजण्यो तशेंच हेर कामांची म्हायती लोकां मेरेन पावोपाची गरज आसा. येवपी वेंचणुकेक लागून गट समित्यो तशेंच हेर सगळ्या समित्यांक सक्रीय करपाची गरज आसा. बसकेंत राजकी तशेंच हेर थाराव चर्चेक येतले, अशी म्हायती दामू नायक हांणी दिली.
गोविंद पर्वतकार, सिद्धार्थ कुंकळ्येकार हांचे सयत प्रदेश भाजप अध्यक्ष दामू नायक हांणी बसकेच्या तयारीचो नियाळ घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
