भांगरभूंय | प्रतिनिधी
उत्तर गोंय जागो ५० हजार मताधिक्क्यान जिखतलेः खलपाचो विश्वास
पणजी, प्रतिनिधी : वचत थंय आमकां लोकां कडल्यान बरो प्रतिसाद मेळटा. ते भायर भाजपाचे लोकूच आमका सांगतात तुमी फुडें वचात भियेवंपाची गरज ना, असो दावो काँग्रेसीचे उत्तर गोंयचे उमेदवार रमाकांत खलप हांणी केला. तशेंच श्रीपाद नायक हे गोंयांत सोडात, लोकसभेंतूय दिश्टी पडनात अशें लोक म्हणपाक लागल्यात, असो गंभीर आरोप खलप हांणी केला.
रमाकांत खलप हांणी मंगळारा सकाळीं पणजे आपल्या प्रचाराक सुरवात केली. ह्या वेळार ते उलयताले. तांचे वांगडा सांताक्रुझचे आदले आमदार व्हिक्टर फर्नांडीस, पणजीचे आदले महापौर तशेंच नगरसेवक सुरेंद्र फुर्तादो आनी हेर काँग्रेस कार्यकर्ते हजर आशिल्ले. खलप हांणी पणजे मार्केटांत वचून दुकानदार आनी विक्रेकारां वांगडा चर्चा केली.
काँग्रेसीक लोकसभा वेचणुकेंत बरो प्रतिसाद मेळटा. लोक मुद्दम आमकां फोन करून फुडें सर म्हणटात. ते भायर भाजपाच्या नांवान गुणगान गावपी लोकूय आमकां फोन करतात आनी सांगतात, तुमी काळजी करनाकात म्हणून. आमी तुमच्या वांगडा आसात तुमकां भियेवपाची गरज ना, असो दावो खलपान केला. आमची उमेद सामकीच तेंगशेर पावल्या आनी सगळ्या वीसूय मतदारसंघांनी आघाडी घेवन उत्तर गोंयचो सीट आमी ५० हजार मतांनी जिखतले, असो विस्वास खलप हांणी उक्तायलो.
श्रीपाद नायक हांचेर लोक बेजार आसात. ताचोच फायदो आमकां जातलो. भाऊ खंय आसा तो आमकां खबर ना. फाटलीं २५ वर्सां जालीं आमी आमच्या खासदारांक पळोवंकूच ना. हांव तरी खंयच्या माधमांतल्यान लोकांक मेळटा. हांव लोकांक दिसता आनी लोकूय म्हाका आकयतात ते म्हज्या संपर्कात आसात. पूण श्रीपाद नायक लोकसभेंत, विधानसभेंत आनी रस्त्यारूय दिसना, अशी परती जाप लोकूय नायक हांकां दिवपाक लागल्यात, असो आरोप खलपान केला.
आमचे कडेन कार्यकर्ते कमी आसात हें खरें. मात उगडास दवरात हे खेपो गुप्त मतदान जावपाचे आसा. हें मतदान तुमकां सामकेंच धक्को दितलें आनी खलप हे परत एक फावट संसदेंत वतले. पणजे, ताळगांव सयत पुराय तिसवाडी मतदारसंघांत खलप हांकांच जैत मेळटलें, असो विस्वास सुरेंद्र फुर्तादो हांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
