भाजपान नोकऱ्यो दिवंक नात, विकल्यो

भांगरभूंय | प्रतिनिधी

युरी आलेमांवः मेगा जॉब फॅरांत मुख्यमंत्र्यान केल्ल्या विधानाचेर उक्तायली प्रतिक्रिया

भांगरभूंय । प्रतिनिधी

मडगांवः कर्मचारी निवड आयोगा वतीन नोकर भरती हें काँग्रेसीच्या वेंचणूक जाहीरनाम्यांतल्या एक आस्वासनाची अंमलबजावणी करपाचें मुख्यमंत्र्यांचें पावल. ताका येवकार. मात ते खातीर जानेवारी मेरेन कित्याक रावपाक जाय? आतांच अधिसुचोवणी जारी करात. मुख्यमंत्री डॉ. प्रमोद सावंत खरे उलयले, भाजपाचे मंत्री आनी आमदारांनी केन्नाच नोकऱ्यो दिवंक नात. तांणी नोकऱ्यो विकल्यो, असो आरोप विरोधी पक्ष फुडारी युरी आलेमांव हांणी केलो.

मुख्यमंत्री डॉ. सावंत हांणी मेगा जॉब फॅरांत केल्ल्या विधानाचेर आलेमांव प्रतिक्रिया दिताले. तांणी नोकर भरती घोटाळ्या संबंदांत भाजपा सरकाराचेर टिका केली.

नगरपालिका नगराध्यक्ष वेंचणुकेंत सत्ता बळकावपा खातीर अध्यादेश हाडपाक भाजपा सरकारान जी तत्परता दाखयली, तीच आतांय कर्मचारी निवड आयोगा वतीन नोकर भरती करपाक दाखोवपाक जाय. मुख्यमंत्री डॉ. सावंत खरे उलयले. तांचें म्हणणें सामकें बरोबर सा. भाजपाचे मंत्री, आमदार, पदाधिकाऱी हांणी केन्नाच पात्र उमेदवारांक नोकरी दिवंक नात, तांणी फक्त नोकऱ्यो विकल्यो. हाचे वयल्यान नोकर भरती भानगडींत मुख्यमंत्र्यांचे आशिर्वाद आशिल्लें हें उक्तें जालां. उसरां जावं ही बरी सुरवात जाल्या. आतां कर्मचारी आयोगा वतीन सगळी नोकर भरती हाडपाची अधिसुचोवणी ताकतिकेन जारी करची. जानेवारी मेरेन वाट पळोवपाची गरज ना. आयज सावनूच नोकरभरतेंत पारदर्शकता येवंदी, अशी मागणी आलेमांव हांणी केली. वेर्णें उद्देगीक वसणुकेंतल्या 130 कामगार संपार आसात. मुख्यमंत्र्यान तांचे कडेन लक्ष दिवचें आनी तांच्यो सेवा नियमीत करचे खातीर सरकारान हस्तक्षेप करचो, अशीय आलेमांव हांणी मागणी केली.

‘गोवा व्हिजन 2036’ ची अंमलबजावणी करची

काँग्रेस पक्षान तयार केल्ल्या ‘गोवा व्हिजन 2036’ रोडमेपांतलें दर उतर वाचून ताची सरकारान अंमलबजावणी करची, अशी मुख्यमंत्री डॉ. प्रमोद सावंत हांकां विनवणी करतां. ‘गोवा व्हिजन 2036’ हो रोडमॅप नामनेच्या तज्ञांनी तयार केल्ल्या गोवा व्हिजन 2035 दस्तावेजाचेर आदारीत आसा. ताका लागून बेरोजगारीचे सगळे प्रस्न सुटावे जावपाक मजत जातली आनी गोंयचें प्रगतशील राज्यांत रुपांतर जातलें, अशें युरी आलेमांव हांणी सांगलें.