भांगरभूंय | प्रतिनिधी
सुलक्षणा सावंत, सुवर्णा तेंडुलकार हांणी घेतली भेट
पणजी: दक्षीण गोंयच्या उमेदवारी खातीर भाजपान बायलांच्या नांवाचोय विचार सुरू केल्ल्यान वेंचणूक प्रभारी आशीश सूद मंगळारा दनपारां गोंयांत दाखल जाल्यात. पणजेंतल्या भाजप कचेरेंत महिला मोर्चाच्यो अध्यक्षा आरती बांदोडकार, सुलक्षणा सावंत आनी सुवर्णा तेंडुलकार हांणी तांची भेटूय घेतली. पूण ही भेट बुधवारा गोंयभर मनयतल्या संवसारीक महिला दिसा निमतानच्या कार्यावळी विशीं आशिल्ली अशें तिगांनीय पत्रकारां कडेन उलयतना सांगलें.
भाजपान उमेदवारी खातीर बायलां कडल्यान अर्ज मागोवपाक सुरवात केले उपरांत आशीश सूद रोखडेच गोंयांत दाखल जाल्ल्यान सगल्यांच्यो नदरो तांचे कडेन लागिल्ल्यो. सूद पणजी कचेरेंत दाखल जाले उपरांत कांय वेळांत दक्षीण गोंयच्या उमेदवारी विशीं चर्चेंत आशिल्ल्या सुलक्षणा सावंत आनी सुवर्णा तेंडुलकार हांणी तांची भेट घेतिल्ल्यान हे भेटीत उमेदवारी विशीं चर्चा जाल्ल्याचो अदमास राजकी मळार उक्तायताले. पूण भाजपा वतीन बुधवारा गोंयभर संवसारीक महिला दीस मनोवपाचे आसात. हे कार्यावळीक प्रधानमंत्री नरेंद्र मोदी व्हर्च्युअल पद्दतीन मार्गदर्शन करतले. हे विशीं चर्चा करपा खातीर आमी तांची भेट घेतिल्ल्याचें तिगांनीय सांगलें.
मजगतीं, सूद बुधवारा भाजपाच्या कोअर समितींतल्या वांगड्यां कडेन चर्चा करतले अशी म्हायती गोपांनी दिली.
सुलक्षणा सावंत हांकां मेळूंक शकता संद
सद्या राज्याचे विधानसभेंत बाबूश मोंसेरात-जेनिफर मोंसेरात, विश्वजीत राणे-देविया राणे आनी मायकल लोबो-डिलायला लोबो अशीं तीन जोडपीं आसात. हातूंतलो कोणूच भाजपाच्या केडरा मदलो ना. ताका लागून दक्षीण गोंयांत भाजपान बायलेक उमेदवारी दिवपाचें निश्चीत केल्यार केडर फुडारी आशिल्ल्यो सुलक्षणा सावंत तातूंत आघाडेर आसतल्यो अशी चर्चा राजकी मळार सुरू जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
