भांगरभूंय | प्रतिनिधी
अॅड. रमाकांत खलपः म्हापशें अर्बन प्रकरणा विशीं उक्ती चर्चा करात
भांगरभूंय । प्रतिनिधी
दिवचलः भाजपा वतीन फटकिरो प्रचार चल्ला. भाजपाचें खंयचेंय आव्हान स्विकारपाक आपूण तयार आसा. म्हापशें अर्बन प्रकरणा विशीं उक्ती चर्चा करात, अशें आव्हान उत्तर गोंयचे काँग्रेस पक्षाचे उमेदवार तशेंच आदले केंद्रीय मंत्री अॅड. रमाकांत खलप हांणी दिलें. तशेंच हे खेपे लोक निश्चीत परिवर्तन करतले, असो विस्वास उक्तायलो.
अॅड. खलप हांणी आयतारा दिवचल म्हालांतल्या तिनूय मतदारसंघांची भोंवडी केली आनी लोकां कडेन संपर्क सादलो.
भाजपाचे फाटलीं 25 वर्सां खासदार आशिल्ले श्रीपाद नायक हांणी कितें केलें तें सांगचें, आपणें 18 म्हयन्यांत कितें केलें तें सांगतां. म्हापशें अर्बन बँक प्रकरणांत आपल्याचेर करतात त्या आरोपांक कसलोच आदार ना. हाचेर चर्चा करपाक आपूण खंयचेय माचयेर तयार आसा, अशें अॅड. खलप हांणी सांगलें.
हे खेपे देशांत परिवर्तन निश्चीत आसा. खासदार म्हूण संद मेळ्ळी जाल्यार म्हादय खातीर सगळे तरेची फाटपुरवण करतलों, अशें अॅड. खलप हांणी सांगलें.
सांखळे प्रताप गांवस, नगरसेवक प्रवीण ब्लॅगन, राजेश सावळ, मंगलदास नायक हांचे सयत साबार कार्यकर्ते हाजीर आशिल्ले.
कार्लूस फेरेरा हांणी ह्या वेळार भाजपाचेर टिका करतना 25 वर्सांत खासदारान कांयच करूंक ना, असो आरोप केलो. उत्तर आनी दक्षीण गोंयांतल्यान इंडी उमेदवारांक जैतवंत करात, असोय तांणी उलो मारलो.
सांखळी वाठारांतल्या देवांचो आशिर्वाद घेवन कोनसो बसका जाल्यो. ते परांत कारापूर तशेंच दिवचल वाठारांत देवदर्शन आनी कोनसो बसका जाली.
ह्या वेळार राजन घाटे, संतोषकुमार सावंत, विरेंद्र शिरोडकार, प्रताप गांवस, राजेश कळंगूटकार, महेंद्र म्हांबरे, मनोज नायक, मुस्तफा बेग, झरिना शेख हाजीर आशिल्ली. दिवचले सुत्रनिवेदन काशिनाथ मयेंकार हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
