भांगरभूंय | प्रतिनिधी
मडगांव, प्रतिनिधी : लोकसभा वेंचणूक जिखले उपरांत हांव लोकां खातीर रात- दीस काम करतलीं. लोकांचे प्रस्न सोडोवपाचे यत्न करतलीं. प्रचारा वेळार बेरोजगारी, शिक्षण, बायलां सशक्तीकरणा विशीं विचार केला. पर्यावरण आनी उदरगतीचीं कामां फुडें व्हरतलीं. भाजपाची प्रकल्पां विशीं जी भुमिका आसतली तीच म्हजीय आसतली अशें भाजपची उमेदवार पल्लवी धेंपो हांणी सांगलें.
दक्षीण गोंय जिल्होधिकारी कार्यालयांत जिल्हो वेंचणूक अधिकार्यां कडल्यान लोकसभा उमेदवारी अर्ज सादर केल्या उपरांत उमेदवार पल्लवी धेंपो उलयताली.
भाजपाच्या राज्य पांवड्यार आनी केंद्रीय नेतृत्वान लोकसभा उमेदवारी दिवन आपल्याचेर दाखयल्लो विस्वास तोडची ना. लोकांचे सेवे खातीर सदांच मुखार सरतलीं. टिका करपी विरोधकांचेर कसलेच तरेची प्रतिक्रिया दिवपाची ना. हांवें प्रचाराचेर आनी लोकांक भेट दिवपाचेर लक्ष दिलां. आतां मेरेनच्या प्रचारा वेळार लोकां कडल्यान बेरोजगारी, कुशळटाय उदरगत, शिक्षण आनी बायलां सशक्तीकरण ह्या विशयांचेर विचार करतां. मायनिंगा विशीं सरळ कोणेंच विचारूंक ना वा प्रस्नूय करूंक ना. मात रोजगाराच्यो संदी उण्यो आशिल्ले विशीं विचारतात. म्हादयचो विशय न्यायप्रविश्ठ आशिल्ल्यान ताचेर कितेंच उलोवप शक्य ना. हांव आतां भाजपांत आसा. ताका लागून रेल्वे दोट्टीकरण, कोळसा येरादारी आनी हेर विशयांचेर आनी प्रकल्पां विशीं भाजप पक्षाची जी भुमिका आसतली ती म्हजी भुमिका आसतली. म्हाका मेळपा खातीर लोकांक कसलीच आडखळ येवची ना. वेंचणूक आयले उपरांत हांव मडगांवां कार्यालय उबारतली अशें तिणें स्पश्ट केलें
कोळसो जितलो येता तितलीच ताची येरादारी जाता: मंत्री ढवळीकार
जे लोक कोकण रेल्वेक विरोध करताले, तेच आतां रेल्वेन प्रवास करतात. तेच लोक आतां राज्यांतल्या प्रकल्पांक विरोध करतात. सागरमाला येवजण आयली तरी कोळसो आतां जितलो येता तितली येरादारी जातली. भाजपा वांगडा मगो पक्ष आसा. ताका लागून ताचो फायदो कितलो जातलो हे निकालांत दिसतलें, अशें वीजमंत्री ढवळीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
