भांगरभूंय | प्रतिनिधी
भांगरभूंय । प्रतिनिधी
फोंडेंः दक्षीण गोंय लोकसभा मतदारसंघांतली भाजपाची उमेदवार पल्लवी धेंपो हाणी मंगळारा मडकय मतदारसंघाची प्रचार भोंवणी केली. नागेश, महालक्ष्मी आनी नवदुर्गा देवस्थानांत वचून तिणे आशिर्वाद घेतलो. मडकय मतदारसंघात पयलेच फावट भाजपाच्या उमेदवाराच्या प्रचारा खातीर मगो पक्षान शक्तिप्रदर्शन केलें.
पल्लवी हांच्या वांगडा मुख्यमंत्री डॉ प्रमोद सावंत, वीज मंत्री आनी मडकयचो आमदार सुदिन ढवळीकार, आमदार दिगंबर कमात, उद्देजक श्रीनिवास धेंपो, आदलो राज्यसभा खासदार विनय तेंडुलकार, मगो पक्षाचो अध्यक्ष दीपक ढवळीकार, दक्षीण गोंय जिल्हो पंचायत अध्यक्ष सुवर्णा तेंडुलकार, सरपंच शैलेंद्र पणजीकार, जिल्हो पंचायत वांगडी गणपत नायक, दामोदर नायक आनी हेर वावुरपी आशिल्ले.
ह्या वेळार उलयतना मुख्यमंत्री डॉ सावंत हाणी नरेंद्र मोदी हांकां परत पंतप्रधान करपा खातीर गोयांतल्यो लोकसभेच्यो दोनूय सुवातो जिखपाची सामकी गरज आसा अशें सांगलें. राज्यांत भाजप आनी मगो युतीचें सरकार आसा. विरोधकांच्या हायसाक बळी पडनासतना कार्यकर्त्यांनी पक्षाच्या उमेदवारांक वेंचून दिवपा खातीर वावुरपाचें आवाहन तांणी केलें.
पल्लवी धेंपो हांका मडकय मतदारसघांतल्या व्हडली आघाडी मेळोवन दिवपाक मगो कार्यकर्ते सक्षम आसात. ताका लागून दक्षीण गोंयांत धंपो हांचें जैत निश्चीत आसा अशें सुदिन ढवळीकारान सांगलें. पल्लवी धेंपो हाणी आपले विचार मांडले, गणपत नायकान येवकार दिलो आनी शैलेंद्र पणजीकारान उपकार मानले. सलोनी गावडे हिणे कार्यावळीचें सूत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
