भांगरभूंय | प्रतिनिधी
उमेदवार निश्चित करपा खातीर दिल्लींत म्हत्वाची बसका
पणजी, प्रतिनिधी : लोकसभेचे उमेदवार निश्चित करपा खातीर आयज बुधवारा भारतीय जनता पक्षाच्या फुडाऱ्यांची दिल्लीत म्हत्वाची बसका जातली. राष्ट्रीय अध्यक्ष जे. पी. नड्डा, केंद्रीय गृहमंत्री अमित शाह, मुख्यमंत्री डॉ. प्रमोद सावंत, सचिव बी. एल. संतोश, प्रदेश अध्यक्ष सदानंद तानावडे हे बसकेक हाजीर रावतले.
उत्तर गोंयची उमेदवारी केंद्रीय मंत्री श्रीपाद नायक हांकां मेळपाची शक्यता आसली तरी दयानंद सोपटे, दिलीप परूळेकार, दयानंद मांद्रेकार हांणी उमेदवारीचेर दावो केला. दक्षीण गोंयात जैतिवंत जावपाचे तांकीचेर उमेदवारी निश्चित जातली.
भाजपान उत्तर गोंयांत सेगीत पांच खेपो जैत मेळयलां. पांचूय खेपो केंद्रीय मंत्री श्रीपाद नायक हेच वेंचून आयल्यात. आतां सवे खेपो तांकांच संद दिवची काय नव्या चेऱ्याक पसंती दिवची, हो खर प्रस्न पक्षा मुखार आसा. हे खेप उत्तरेत नव्या मनशाक संद दिवची, अशेंय काय जाणांचें मत आसा. दक्षीण गोयांत अॅड. नरेंद्र सावयकार आनी चंद्रकांत कवळेंकार हांचे मदीं सर्त आसा. अॅड. सावयकार हांकां पक्षान सेगीत तीन खेपो उमेदवारी दिल्या. 2014 वर्सा ते जैतिवंत जाल्यात. चंद्रकांत कवळेकार हे बरींच वर्सां राजकारणात आसात. केपे मतदारसंघात बरेच खेपो ते जैतिवंत जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
