भांगरभूंय | प्रतिनिधी
मडगांवः भाजपाक हारोवन गोंयच्या संरक्षणाचो स्पश्ट संदेश दिवपाची गरज आसा, अशें कुंकळ्ळीचे आमदार आनी विरोधी पक्ष फुडारी युरी आलेमांव हांणी म्हणलें.
गोंयचें कल्याण हें आपलें सर्वोच्च प्राधान्य आसा अशें सांगून तांणी राज्याची राखण करपाची गरज उक्तायली.
चांदरा जाल्ले बसकेंत ते उलयताले. कुंकळ्ळी काँग्रेसीचे गटाध्यक्ष आसीझ नोरोन्हा, संजय वेळीप आनी हेर काँग्रेस कार्यकर्ते ह्या वेळार हाजीर आशिल्ले.
भाजपा सरकारान कायदो आनी सुवेवस्था तशेंच सामान्य लोकांच्या कल्याणा कडेन आडनदर केल्या, अशें तांणी सांगलें.
भाजपा सरकार जात आनी धर्माच्या आदाराचेर लोकां मदीं फूट घालपाचो यत्न करता, देखून दरेकल्यान जागरूक रावपाक जाय आनी वेंचणुकेंत तांकां हारोवन तांचो अजेंडा मातयेभरवण करपाक जाय, अशें आलेमांव हांणी सांगलें.
कोळशाच्या प्रस्नाचेर भाजपा सरकार लोकांचीं फकांडां करता. राज्याचो नाश करपाचो तांचो हेतू आसून लेगीत ते जैत मेळयतात देखून तांकां जाय तें करपाक शकता अशें तांकां दिसता. आतां तांचे उमेदवार जिखले जाल्यार तांकां दिसतलें की लोकांनी आपली गुंडागिरी मान्य केल्या. कोळशाची येरादारी करतना गोंयांत प्रदुशण जाता. हें आमच्या पर्यावरणा खातीर आनी आमच्या फुडारा खातीर सुरक्षीत ना. देखून भाजपाक हारोवप गरजेचें आसा, अशें आलेमांव हांणी म्हणलें.
आमी गोंयच्या संरक्षणा खातीर आसात आनी कोळशाच्या येरादारी आड आसात असो स्पश्ट संदेश ह्या मतदारसंघांतल्यान दिवपाक जाय. गोंयच्या हिता खातीर आमी काम करपाक जाय असो हो दुसरो ‘ओपिनियन पोल’ आसा, अशें तांणी सांगलें.
आपल्या मतान सगल्या विरोधी राजकी पक्षांनी एकठांय येवन भाजपाक हारोवपाक जाय आनी गोंयचे राखणे खातीर काम करपाक जाय अशें अलेमांव हांणी सांगलें.
विरोधी पक्षा कडेन 67 टक्के लोक आसात. तांचे मदीं फूट पडूंक दिवची न्हय. उरफाटें आमकां एकठांय येवन जिखचें पडटलें अशें तांणी सांगलें.
राज्यांत चोरी, दरोडो, बलात्कार आनी हेर गुन्यांव घडटात, पूण सरकार कांयच करिना अशें आलेमांव हांणी सांगलें.
आमकां हे गुन्यांव थांबोवचे पडटले, पूण विरोधी पक्ष जैतीवंत जातलो तेन्नाच हें शक्य आसा, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
