भांगरभूंय | प्रतिनिधी
वेळग्यां विश्वजीत राणे हांचें जाहीर सभेंत आवाहन
वाळपय: लोकांक सतावपी समस्या सोडोवप हें सरकाराचें कर्तव्य आसता. राजकारणी हो सर्वसामान्य घटकांचो सगलो विचार करून ते नदरेंतल्यान विचाराची संकल्पना राबयत आसता. विकास ही न रखडपी प्रक्रिया आसा. हाका लागून विकासाचीं चक्रां घुंवतूच उरतलीं. पूण सर्वसामान्यांक ज्या सुविधांची अपेक्षा आसा, ताची पुर्तताय करप हें दरेकाचें कर्तव्य आसा. हाका लागून फुडारांत खोतोडें पंचायत वाठारांत आशिल्ल्या खूबश्यो प्रलंबीत समस्या सोडयतले. पूण येता ते लोकसभा वेंचणुकेंत परतून एकदां भाजपा फाटल्यान खंबीरपणान उबे रावन आपली शक्त दाखोवन दियात अशी विनंती भलायकी मंत्री विश्वजीत राणे हांणी केली.
खोतोडें पंचायत वाठारांतल्या वेळगें हांगा आयोजीत केल्ले भाजपाचे जाहीर सभेंत ते उलयताले. ह्या वेळार उत्तर गोंयचे उमेदवार श्रीपाद नायक, पंचायतीचे सरपंच रोहिदास गांवकार, जिल्हो पंचायत वांगडी राजश्री काळे, भारतीय जनता पक्षाचे वाळपय मंडळ अध्यक्ष रामनाथ डांगी, भाजपचे प्रभारी विनोद शिंदे, उपसरपंच नंदिनी माळशेकार पंच वांगडी नामदेव राणे, प्रशिला गांवकार, राजाराम परवार, सलोनी गांवकार, प्रतिमा वंडेकार, देवस्थानचे काशिनाथ गांवकार, मिलिंद गांवकार हांची खासा हाजेरी आशिल्ली.
मुखार उलयतना राणे हांणी म्हणलें, वेळगें आनी दाबोस मजगतचे न्हंयचेर पुलाची उबारणी जाली जाल्यार वेळगें-वाळपय मजगतचें अंतर फक्त तीन किलोमिटर उरतलें. हाचो व्हड प्रमाणांत फायदो वेळगें तेच प्रमाण हेर संबंदीत वाठारांतल्या लोकांक जातलो. हांगा पुलाची उबारणी करची अशी मागणी खूब वर्सां सावन वाठारांतले ग्रामस्थ करीत आसात. ते नदरेंतल्यान निश्चितूच विचार करतले. कारण हो पूल सामको गरजेचो आसा. हे विशींची प्रक्रिया वेंचणूक आचार संहिता सोंपले उपरांत हातांत घेवं अशें आस्वासन तांणी दिलें.
भाजपाचे उमेदवार श्रीपाद नायक हांणी म्हणलें, फाटल्या पंचवीस वर्सां सावन उत्तर गोंयच्या लोकांनी खूब मोग दिलो, आपुलकी दिली, विस्वास दिलो. आपले फाटल्यान खंबीरपणान लोक उबे राविल्ल्यान केंद्र सरकारांत मंत्रीपदाची संद मेळ्ळी. परतून एकदां सगल्यांच्या विस्वासाच्या बळार वेंचणूक लडयतां. सगल्यां परस चड आघाडी घेवन सत्तरी म्हालांतल्या लोकांच्या तेंक्यार ही वेंचणूक आपूण निश्चीतपणान जिखतलों अशें तांणी म्हणलें.
ही वेंचणूक देशाच्या फुडाराचे नदरेंतल्यान सामकी म्हत्वाची आसा. कारण नरेंद्र मोदी हांकां परतून एकदां प्रधानमंत्री करपा खातीर सगल्यांनी आपले मोलादीक मत भाजपाक दिवचें अशी विनंती नायक हांणी केली.
सुरवेक पंचायतीचे सरपंच रोहिदास गांवकार हांणी सगल्यांक येवकार दिलो. तेच प्रमाण खोतोडें पंचायत वाठारांत प्रलंबीत आशिल्ल्यो खूबश्यो समस्या सोडोवपाचे नदरेंतल्यान आतां मेरेन भलायकी मंत्री विश्वजीत राणे हांणी बरे तरेचें सहकार्य केलें. फुडारांतूय बऱ्यो सुविधा ह्या पंचायत वाठारांत उपलब्ध जावच्यो हे खातीर सहकार्य करचें अशी विनंती तांणी केली.
माचयेर आशिल्ल्या मानेस्तांक फुलांतुरो भेटोवन येवकार दिलो. पुराय कार्यावळीचें सुत्रसंचालन राघोबा गांवकार हांणी केलें. उपसरपंच नंदिनी माळशेकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
