भांगरभूंय | प्रतिनिधी
नगरसेविका सुशांता सयत केतन हांचो मुळाव्या वांगडीपदा वेल्यान राजिनामो
मडगांव, प्रतिनिधी : आदले नगरसेवक तशेंच भाजप मंडळाचे सरचिटणीस केतन कुडतरकार हांणी नगरसेवक सुशांता हांचे सयत भारतीय जनता पक्षाच्या मुळाव्या वांगडीपदा वेल्यान राजिनामो दिलो. दुसर्या पक्षांतल्यान आमदार भाजपांत आयिल्ल्याक मूळ कार्यकर्त्यांक अशेच सोडून दिल्यात. हीच परिस्थिती पुराय राज्यभर आसा. मात ताचेर एकलो पसून उलोवपाक वचना, अशें केतन कुडतरकार हांणी सांगलें.
पत्रकार परिशद घेवन केतन हांणी भाजपाच्या मुळाव्या वांगडीपदाचो राजिनामो दिल्ल्याचें सांगलें. आपूण वा आपल्या घरांतलीं भाजपाचीं खर फाटराखणीं. पोस्टर लावपा सारकिल्लीं लेगीत कामां केल्यांत. परत परत पक्षूय बदलूंक ना. आमदार कामत हे भाजपांत आयले उपरांत आपल्याकूय बरें दिशिल्लें. सरकार भाजपाचें जरी असलें तरी कोणाचीं तरी कामां उरिल्लीं तीं जातलीं अशें दिसतालें. भाजपच्या धोरणा प्रमाण कामां जाल्यार मडगांवां बदल घडटलो अशें दिसतालें. मात आतां भाजपाच्या मूळ कार्यकर्त्यांक किंकोंत करून नव्या कार्यकर्त्यांचीं कामां जातात. मूळ कार्यकर्त्यांक कुशीक काडून तांचीं कामां जातात हें दिसून आयलें. पक्ष सत्तेर आसून लेगीत लोकांचीं कामां जायनात. ताका लागून झगडचें पडटा. भाजपच्या मूळ कार्यकर्त्यांचेर नव्यानूच पक्षांत आयिल्ल्यां कडल्यान अन्याय जाता. अशें मडगांवां सयत जंय आमदारांक प्रवेश दिला थंयूय अशें जाता. आमदारांच्या चेंपणा खाला रावून काम करपाक शकना. घाणयार्या उदकाचो प्रस्न, रिंगरोडावेल्या १५ कुटुंबांचो विशय आमदारां कडेन मांडलो, मात तांणी लक्ष दिवंक ना. कार्यकर्त्यांक सोडून दिल्ल्या प्रस्नाचेर मुख्यमंत्र्यांनीय कार्यकर्त्यांची बसका घेतिल्ली. मात कांयच जावंक ना. लोकांच्या सांगण्या प्रमाण भाजप सोडलें आनी आतां कोणाच्या पक्षांत वच्चें हाचोय निर्णयूय लोकां कडेन चर्चा करुन घेतलों, अशेंय कुडतरकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
