भांगरभूंय | प्रतिनिधी
पेडणें: भाईडवाडो- कोरगांवच्या श्रीराम केरकार हांच्या पोशिल्ल्या सुण्याचेर आयतारा रातीं उसरां बिबट्यान हल्लो करपाची घडणूक घडली. ह्या अचकीत जाल्ल्या हल्ल्यांत ह्या वाठारांत भंयाचें वातावरण निर्माण जाला. हल्ल्या वेळार घरांतल्या वांगड्यांनी बोवाळ करून धांव मारिल्ल्यान बिबट्यान थंयच्यान पळ काडलो. मात ह्या हल्ल्यांत सुणो गंभीर जखमी जालो.
थळाव्यांच्या म्हणण्या प्रमाण, पेडण्यां म्हालांत बिबट्याचो वावर दिसानदीस वाडतूच आसा. ह्यान पयलीं जायते पोशिल्ले सुणी, गोरवांचेर बिबट्यान हल्लो करून तांकां मारून उडयिल्ल्याच्यो घडणुको घडल्यात. हाका लागून नागरिकां मदीं बरोच भंय निर्माण जाला. आतां घरा भायर सरपाकूय लोक भियेतात.
श्रीराम केरकार तशेंच ह्या वाठारांतल्या नागरिकांनी रान खात्याकडेन हे विशीं बेगोबेग दखल घेवपाची मागणी केल्या. हे घडणुके उपरांत रान खात्यान अदीक सतर्क रावन कारवाय करपाची गरज आशिल्ल्याचें मत नागरीक उक्तायतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
