भांगरभूंय | प्रतिनिधी
फिफा फुटबॉल वर्ल्ड कप सुरू जालां आनी टीव्ही पळोवन म्हाका म्हज्या ल्हानपणांतल्या म्हापशेंच्या धुळेरांतल्या दिसांची याद जाता. तेन्ना आमी धुळेर फुटबॉल मैदानाच्या खूब लागीं रावतालीं. Taa Goa म्हणून एका स्पर्धेंतल्यो फुटबॉल मॅची पळोवपाक हांव ग्रावंडार वतालों.
म्हाका अजूनय कितल्योश्योच टीमी याद जातात. म्हापशेंची बेन्फिका टीम सदांच तांबड्या शर्टांत आनी धव्या पँटींत खेळटाली. तांचो फुल-बॅक कॉन्सेसांव (Concesso) अजून याद आसा. मोट्टो आशिल्लो. इतलो मोटो की बॉल ताका पळोवन परतून वतालो. ताचे उपरांत अकॅदामीका टीम सदांच काळ्या जर्सींत खेळटाली. ह्या पंगडांत झार (Czar) आनी इव्हन (Even) हे खेळपी आशिल्ले आनी तेय आमच्या घरा पसून लागींच रावताले. आमच्या घरा मुखा वेल्या रस्त्यार ते चलत वचतना पळोवप म्हणजे आयच्या काळांत रोहित शर्मा वा दुसरो कोणूय क्रिकेट स्टार पळोवपाक मेळ्ळ्या सारकेंच म्हाका दिसतालें.
व्ही. एम. साळगांवकार हांचो साळगांवकार क्लब तांबड्या पट्ट्यांच्या जर्सींत खेळटालो आनी बऱ्याच वेळा पोयंट टेबलार पयलें स्थान मेळयतालो. पूण वास्को क्लब सदांच तांकां मोठी टक्कर दितालो. वास्कोचे खेळपी पाचव्या जर्सींत खेळटाले. वास्को टीमीचें खेळप म्हाका खूब आवडटालें. कसलोच रफ खेळ ना, एकामेकांक पास करून बॉल फुडें व्हरप.
ह्या सगल्या पंगडांनी बरेच गोंयकार खेळपी आशिल्ले. तातूंतलो ईंडेपेंडेंट क्लबाचो वासू खूब गाजतालो. फेरोव्हियारेश (रेल्वे) नांवाची एक टीम आशिल्ली, तशेंच एमसीसी (मडगांव क्रिकेट क्लब) ची फुटबॉल टीम आशिल्ली.
पूण सगल्यांत आवडटी टीम म्हणल्यार लुबेचो शिओलीं फुटबॉल क्लब. ह्या टीमीतले सगलेच खेळपी गोंयकार आशिल्ले. तातूंतलो नेल्सन रस्त्यार चलतना दिसलो जाल्यार म्हाका खूब खोशी जाताली. पूण शिओलीं दुसऱ्या डीव्हीजनांत खेळटाली आनी ताचे बरोबर कळंगूट स्पोर्ट्स क्लबूय खेळटालो. ही टीम रफ खेळा खातीर इतली फामाद आशिल्ली की तांच्या खेळाक लागून म्हज्या मनांत कळंगूटच्या लोकां विशीं एक वायट इंप्रेशन तयार जाल्लें. तशेंच स्पोर्टींग नांवाचो एक क्लब आसलो. डेंपो सौझा क्लब, जो फुडें डेंपो स्पोर्ट्स क्लब जालो, तोय त्या काळांत आसलो.
खास करून आयतारचे मॅचींक खूब गर्दी जाताली आनी चड मजा येताली.
गोंय मुक्त जाले उपरांत बर्याच वर्सांनी मफतलाल स्पोर्ट्स क्लब गोंयांत कितल्योश्योच फ्रेंडली मॅची खेळ्ळे. तांतली एक म्हापश्यां जाल्ली. मुंबयच्या ह्या टीमीन दाखयिल्लो बॉल टॅकल करपाचो आनी ड्रिब्लींग करीत बॉल फुडें व्हरपाचो कसब पळोवन आमी सगले आजाप जाले. मागीर समजलें की तांचे चडशे खेळपी मुंबयंतले गोंयकार आशिल्ले.
त्या काळांत गोंयांत अंगोलाचे सैनीक आसले आनी गोंय मुक्त जावपाच्या फक्त एक वर्सा पयलीं ते परतून गेले. आमी तांकां “खांप्री” म्हणटाले. तांतलो एक साळगांवकार स्पोर्ट्स क्लबाक बरो फुटबॉल खेळटालो.
थोड्या दिसां आदी हांव म्हज्या क्लुब दी गास्पार डायस क्लबांत मारिओ मिरांडा यांच्या जल्मशताब्दी उत्सवाक गेल्लों. रजिस्टराचेर सय करतां करतां एक बायल म्हजे कडेन पळोवन हांसली आनी तिणें म्हणालें , ‘मिस्टर नाईक, तूं ओळखीचो दिसता.’
म्हाका आजाप दिसलें. तिका म्हजें नांव कशें समजलें? तिणें म्हणलें की हांव सय करताना तिणें रजिस्टरांतलें नांव वाचलें.
फुडल्या खबरांनी कळ्ळें की ती नवतारा रेस्टॉरंण्टाच्या तावोरा भावांची भयण आसा. म्हज्या स्मरणशक्तीन काम केलें आनी हांवें तिका म्हणलें, “तूं स्वर्गीय लुबेची धूव आसतली.”
ती हांसली आनी म्हणलें, “हय, सारकें.”
ते उपरांत हांवें तिका सांगलें की पयलीं लुबे शिओली फुटबॉल क्लबाचो मालक आशिल्लो आनी ताचो होम ग्रावंड धुळेर. दुख्खाची खबर म्हणजे हांवें पळयिल्ल्या चडश्या मॅचींत शिवोली क्लब हारतालो. पूण लुबेची आपल्या संघाचेर अपार माया आनी उमेद आसली. ग्रावंडाचे कडेन उबो रावन तो आपल्या खेळप्यांक परतून परतून उलो करीत- “पास कर!”, “शूट मार!”, “फुडें व्हर!” आनी अशें कितें कितें सांगत रावतालो. सगलें पुर्तुगेज भाशेंत.
वा! त्या भांगराळ्या दिसांच्यो यादी आयजूय येवपाक लागतात.
अरुण नायक
9923774721
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
