भांगरभूंय | प्रतिनिधी
हिंदूत्व आनी हिंदू राश्ट्र संकल्पना देशांत नेट धरपाक लागल्या. हिंदुत्वाची धार, खरसाण उणी केल्ले कारणान शिवसेनेच्या
आमदारांनी सेनाप्रमुख उद्धव ठाकरेची साथ सोडली. हिजाब, उक्त्यार नमाज, लाउड स्पिकर, मुस्लिम भाजीवाले हांचो विरोध करत हिंदू राश्ट्र ट्रेलर आयज देशांत दाखोवप सुरू जालां. उत्तरेंत भाजपाच्या राज्यांत मुस्लिम आरोपींक जबाब दिवपाची संद दिनासतना घरांचेर बुलडोझर चडयतात. मात, हिंदू आरोपी तरणाट्यांक प्रशासन, आमचे वाट चुकिल्ले, विपक्षान दिशाभूल केल्ले भुरगे म्हणत तांचे विरोधांत खर कायदेशीर कारवायो टाळतात.
राम मंदीर, काशी विश्वेश्वर मंदिरांत पुजेंत यजमानपण करता तेन्ना मोदी न्हंयंत न्हातात ते पूजेची सांगता जातासर सगळ्या कर्मकांडाचे सविस्तर धावते वर्णन सगळ्या चॅनलांचेर दाखयतात. चडशे चॅनलूय हिंदुत्ववादी जाल्यात. संरक्षण मंत्री राजनाथ सिंह देशांतलो लिंबू फ्रान्सात राफेल लढावू विमानाचे रोदापोंदा शास्त्रोक्त पद्धतीन चिड्डिले उपरांतच तांची सांकेतीक डिलीवरी घेता. भावी राश्ट्रपती द्रौपदी मूर्मू देवळाच्या प्रांगणात सारण मारता ते फोटे आता दाखोवप ही भावी राश्ट्रपती हिंदुत्ववादी आसतली, हाचे संकेत. वर्णव्यवस्था पाळप सुरू जालां. दलितांक उत्तर भारतांत उच्चवर्णीय आपल्या बांयचेर उदक भरपाक दिनात आनी लग्न प्रसंगांत दलित न्हवऱ्यांक व्हंकलेच्या घरा घोड्यांचेर बसून वचपाक उच्चवर्णियांचो विरोध आसता. बलात्कारी उच्चवर्णी आनी पिडिता दलित आसत जाल्यार पोलिस दोश तिच्या चारित्र्याक दितात.
राश्ट्रीय पांवड्या वयले संत, महंत, योगी हांकां अभिप्रेत आशिल्ल्या हिंदू राश्ट्राचे संकल्पनेक ह्यो घडणुको पूरक म्हणू येतात. फेब्रेरांत प्रयागराजांत जाल्ले मेळाव्यांत अ. भा. विद्वत परिशदेचे सचिव कामेश्वर पांडे हांचे अध्यक्षते खाला बसयिल्या समितीक हिंदू राश्ट्राचे संविधान निर्मितीचें काम दिलां आनी ताचो मसुदो फुडल्या वर्सा माघ मेळाव्यांत संतसमाज आनी श्रद्धाळूं मुखार दवरपाची मोख दवरल्या.
धर्मक्षेत्र काशी हिंदू राश्ट्राची राजधानी आसतली. थंय 48 एकरांत दिल्ली संसदेच्या धर्तेचेर संसदेची स्थापना जातली. मतदाना खातीर सकयलची वयोमर्यादा 16 दवरतले. देशांत 543 धार्मिक सांसद निवडून हाडटले. शीख, बुद्ध, जैन धर्मियांक मतदानाचो हक्क दितले. मुसलमान, ख्रिश्चनांक फकत मान दितले, पूण मतांचो अधिकार दिवचे नात. संविधानांत धर्मनिरपेक्षता (सेक्युलरीझम) आनी सामाजिक समानता (सोशलिझम) उरची नात हे सूज्ञांक वेगळे सांगपाची गरज ना. देशाचे प्रशासन श्रीमद्भगवद्गीता, मनूस्मृती, वेद, रामचरीतमानस, पुराणा हांतूतल्या तत्वांचेर आधारीत संविधानानुसार चलयतले.
“चातुर्वर्ण्य मया सृष्टं गुणकर्मविभागश: ” अर्थात गुण आणि कर्म हांचे आधाराचेर ब्राह्मण, क्षत्रिय, वैश्य आनी शूद्र हांकां विभागून हे चार वर्णांचो समूह आपणे केला, अशे गीतेत स्वता कृष्णान अध्याय 14 श्लोक 13 त सांगलां. तसलीच विभागणी मनूस्म़ृतींतूय सांगल्या. म्हळ्यार राज्य चलोवपी चंद्रगुप्त क्षत्रिय आनी ताका सल्लो दिवपी चाणक्य बामण आसचो पडलो. शिंदे, सिंग आडनावांच्या व्यक्तींक धर्मसंस्थेच्या मायचेर बसून धर्मा विशीं उपदेश करपाक मेळचे ना. मनुस्मृती नुसार तो हक्क बामणांचो. अर्थात राज्य, धर्म प्रशासन पयले दोन वर्ण चलयतले. तिसऱ्या आनी चवथ्या वर्णांतल्यांक तांका मनुस्मृतींत सांगल्यांत तीं कामां करचीं पडटली. खरो प्रश्न आसा तो काब्राल, मोंसेरात सारकेल्यांनी कसलीं कामां करपाचीं तो. महर्शी मनू आणि कृष्णान ते सांगिल्ले ना, कारण ख्रिस्ती धर्म हो हालींच्या काळांतलो.
हिंदू राश्ट्र न्यायप्रणालीत हिंदू कायदे आनी खास्त दिवपाची पद्धत आपणायल्यार मौर्य, मराठा काळांतल्यो दोंगरा वयल्यान धुकलप, सुळार चडोवप, हत्तीच्या पांयां पोंदा दिवप, हात तोडप, वीख दिवप, लासून उडवप हांचे सारकेल्यो ना जाल्यार थेट गरूड पुराणांतल्यो तापयिल्ल्या तेलाच्या कायलींत उकळप, मोनजातीचे खाण करप, कात सोलून काडप सारकिल्ल्यो खास्ती दिवच्यो पडटल्यो.
हिंदू राश्ट्रांत मशिदींत मुर्ती, शिवलिंग मेळ्ळे हाचे पुरावे एकठांय करपाक सरकारी पुरातत्व विभागाक थंय खणत खरस काडची पडची ना. देशांत, गोयांत निर्विघ्नपणान देवळां बांदपाक मेळटली. केंद्रांत आनी राज्यांत देवळा बांदपाक स्वतंत्र खाते, मंत्री आनी बजेट आसतले. चडांत चड देवळां बांदपी राज्याक आदर्श हिंदू राज्य पुरस्कार फावो जातलो. ऋग्वेदांतले वशीकरण सुक्त वापरून घडये मुसलमानांक हिंदू करून उडयत. प्रधानमंत्री, मुखेल मंत्री हांणी देवपूजा केले उपरांत जय श्री राम उद्घोशांत संसद आनी विधानसभेचे कामकाज सुरू जातलें. राहूकालांत कसलेच निर्णय घेवचे नात. मधल्या ब्रेकाचे वेळार हनुमान चालीसा पठण करपा खातीर स्वतंत्र खोली आसतली.
कडवे संस्कृतीप्रेमी हिंदू चलयांनी जीन्स, शॉर्टस घालपाचे विरोधांत फरमान काडटले. धर्मशास्त्रांत सांगिल्लेवरी घरकान्नीनी मंगळसुत्र घालप, कुकुम लावप, वेणी घालप, नाक, कान तोपून घेवप आनी विधवांनी मंगळसूत्र तोडप, कुकुम पुसप, धवे न्हेसप हाची सक्ती जातली.
धर्म आधारीत सत्ता आशिल्ले देश सदांच भीकेक लागले, हाका अपवाद ना. इस्लामिक देश पाकिस्तान आनी शरिया कायद्या नुसार चलपी अफगाणिस्तानांत सुन्नी पंथीय शिया, सुफी पंथियांच्या मसजिदीचेर बाँब घालून संपत्तीय नश्ट करतात आनी प्रार्थने खातीर जमिल्ल्या आपल्याच धर्मबांधवांचो जीवूय घेतात. अल कायदा आनी इस्लामिक स्टेट सूडबुद्धीन एकामेकांचे सभासदांक मारत आसतात. पाकिस्तानांत तहरिक-ए-तालिबान थंयच्या सरकारा कडेन आपले वर्चस्व आशिल्ल्या भागांत आपले स्वतंत्र प्रशासन स्थापन करपा खातीर सरकारा आड झूजता.
भारतांत मुस्लिम विरोधांत धर्मसंस्थेंत एकठांय आयिल्ले यति नरसिंहनंद, आनंद स्वरूप, साध्वी अन्नपूर्णा आनी धर्मांतर करून जितेंद्र नारायण त्यागी जाल्लो वसिम ऱिझवी आयज एकमेकाचे दुस्मान जाल्यात. कोट्यांनी दुडवांच्या भ्रश्टाचाराचो एकामेकांआड आरोप लावपाक लागल्यात. हनुमानाच्या जल्मस्थळा विशी भासाभासे वेळार एक महंत मायक घेवन दुसऱ्याक मारपाक गेल्लो ती चित्रफीत आमी पळयल्या. धार्मिक राश्ट्र स्थापचे वेळार इतर धर्मा विरोधांत एकठांय आयिल्ले एकाच धर्मांतले विंगड पंथीय सत्तेत वर्चस्वा खातीर एकमेकाच्या जीवार उठतात.
अग्निपथ येवजणेच्या विरोधांत देशभर उसळिल्ल्या दंगलीत रेल्वे, रेल्वे स्टेशना, बस, बस स्टॅंड तरणाट्यांनी पोलिसां मुखार फोडून, लासून देशाची रू. 700 कोटींची संपत्ती मातयेभरवण केली. 130 कोटींच्या देशांत जर धार्मिक भावनेक लागून देशभर दंगे उसळत जाल्यार किते परिस्थिती जातली हाची आमी कल्पना करू शकतात. देशाचो हिंदू पाकिस्तान जातलो. आदले हिंदू राश्ट्र नेपाळ आयज धर्मनिरपेक्ष संसदीय गणराज्य जालां. धार्मिक दंभ आनी कट्टरपणा पसून दोन हात पयस रावप देशांत शांततायेक, उदरगतीक केन्नाय योग्य.
दीपक लाड
पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
