भांगरभूंय | प्रतिनिधी
पणजी ः राष्ट्रीय आरोग्य अभियाना खाला भलायकी खातें वेगवेगळ्या 25 पदां खातीर 138 पदांची भरती करतलें. सगळीं पदां एका वर्साच्या कंत्राटाचेर भरतले. उमेदवारां कडेन पदा प्रमाण गरजेची शिक्षणीक पात्रताय आसपाक जाय. इत्सूक आनी पात्र उमेदवारांनी 27 ऑक्टोबर मेरेन https://forms.gle/wckAEkfcAitMknDMA ह्या संकेतथळाक भेट दिवन ऑनलायन अर्ज भरपाचे आवाहन भलायकी खात्यान केला.
वयल्या 138 पदां मदीं चडांत चड 68 पदां कम्युनिटी भलायकी अधिकाऱ्यां खातीर आसात. ह्या पदा खातीर बीएससी नर्सिंग (एचडब्ल्यूसी) पदवी आसप गरजेचें. ह्या पदा खातीर म्हयन्याक 20 हजार रुपया पगार दितले. 68 पदां मदलीं 35 पदां उक्त्या वर्गा खातीर राखून दवरल्यांत आनी हेर पदां आरक्षित आसात. हाचे उपरांत स्टाफ नर्सची (एचआर) 25 पदां भरतले. हे खातीर नर्सिंग विशयात पदवी वा डिप्लोमा आसप गरजेचें. हाचे खातीर पगार 15 हजार रुपया दितले.
दोनूय जिल्ह्यांनी फार्मासिस्टाचीं 12 पदां भरतले. हाचे खातीर बी./डी फार्म पदवी आसप गरजेचे. हाचो पगार म्हयन्याक 12 हजार रुपया आसतलो. वेगवेगळ्या प्राथमीक भलायकी केंद्रांनी समुपदेशक म्हूण 6 पदां भरतले. हाचे खातीर 11 हजार रुपया पगार आनी मानसशास्त्र वा समाजशास्त्रांत पदवी आसप गरजेचें. ब्लॉक एपिडीमीयोलोजिस्टची 4, पिडियाट्रीशन, वैजकी अधिकारी, आयुश दोतोर आनी हेल्थ व्हीजीटर हे खातीर दरेकीं 2 पदांचेर भरती जातली.
हाचे भायर गायनॉकोलोजीस्ट, सोनोलोजीस्ट, दंत सर्जन, विशेश प्रशिक्षक, डिमाग्राफर, ड्रायव्हर, डेटा एंट्री ऑपरेटर, प्रशासकीय सहाय्यक, संगणक सहाय्यक, डेटा सहाय्यक, दंत तंत्रज्ञ, पंचकर्म, रेडिओग्राफर, आयईसी सुपरवायझर, जिल्लो प्रकल्प सहाय्यक हाचे खातीर दरेकी एक पदाचेर भरती जातली. उमेदवारांक आडवाद सोडल्यार 15 वर्सां रेसिडेन्ट प्रमाणपत्र आसपाक जाय. तशेंच सगळ्यांक कोंकणीचें गिन्यान आसपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
