ब्रेन ट्युमराचेर आयल्यात नवे उपचार

भांगरभूंय | प्रतिनिधी

राष्ट्रीय आंकडेवारी प्रमाण मेंदवांतल्या ट्यूमराचो आंकडो दर एक लाख लोकां फाटल्यान सुमार 5- 10 आसता. सगळ्या प्रकारच्या कॅन्सरांतले 40% कॅन्सर मेंदवांत पातळटात. प्रौढांत मेंदवाचे ट्यूमर पयल्या 10 प्रकारच्या ट्यूमरांत आशिल्ले आनी भुरग्यांच्या कॅन्सरांतले दुसरे क्रमांकाचेर. 2000 वर्सा सावन 8 जूनाक संवसारीक मेंदवाचो ट्यूमर दीस म्हूण पाळटात. मेंदवाचो एक ट्यूमर. ह्या दोन उतरांनी तुमकां भंय दिसता? फाटीच्या कण्यांतल्या कलकल सुट्टा? हाकाच लागून हो दीस पाळपाक जाय. चड करून जागृताय, शिक्षण आनी सगळ्यांत म्हत्वाचें म्हणल्यार यादस्तीक दीस म्हणून.

एक दशका परस चड काळ मेंदवाच्या ट्यूमरांचें निदान आनी उपचार केल्ल्या जायत्या दुयेंतीच्या (आनी तांच्या कुटुंबाच्या) जिविताचो हांव एक भाग जावन आसा. तांची पयली प्रतिक्रिया प्रलय लागीं पाविल्ल्या सारको भंय, अविस्वास, हट्टी भावना, अखंड झूज आनी जायते फावटीं जैत हांवें पळयलें. आयज वैजकी आनी हेर कडेन तंत्रीक उदरगत जाल्ली आसून लेगीत जेन्ना जेन्ना दुयेंतीक मेंदवाचो ट्यूमर जाला, अशें कळटा तेन्ना तेन्नाच भिरांतीचें ल्हार आयिल्ल्याची भावना निर्माण जाता. मेंदवांतले सुमार 70% ट्यूमर कॅन्सर नाशिल्ले आसून लेगीत अशें जाता.

देखीक – मेनिंजियोमा घेवचो. सगळ्यांत चड प्रमाणांत जावपी प्राथमिक सौम्य कपालांतलो ट्यूमर म्हळ्यार मेनिंजियोमा. आमच्या मेंदवाक आनी मेरुरज्जू भोंवतणी आशिल्ल्या तीन पड्ड्यांतल्या एका पड्ड्यांतल्यान मेनिंजियोमा तयार जाता. अशे तरेन मेनिंजियोमाचो उगम मेंदवांतल्यान जायना. तातूंतले चडश्यांची विशिश्ट आकारा मेरेन पावतकच लक्षणां दिसतात. वाडत वचत ते लागसारच्या मेंदू, तंत्रिका वा रगत धमनीचेर संकुचीत वा दाब दिवंक शकता. आमी मेंदू वा कुडीचें स्कॅन करतना केन्ना केन्नाय ते मेळटात.

केन्ना केन्नाय आमी दुसऱ्या कारणाक लागून मेंदू वा मेरुरज्जू स्कॅन करतना ते मेळटात. जायत्या मेनिंजियोमाचेर रोखडेंच उपचार करपाची गरज नासता आनी ताचे बदला ताचेर नदर दवरतात. ते भायर हे कॅन्सर भायल्यान भितरल्यान तयार जातात देखून ते चड करून उणाव निर्माण करिनात.

अशे तरेन मेंदवाचे ट्यूमर सौम्य वा घातक आसूं येतात. तशेंच ते प्राथमिक वा दुय्यम (मेटास्टॅटिक) आसूं येतात. संवसारीक भलायकी संघटनेन ह्या घायांचे 100 परस चड वर्ग आनी उपप्रकार केल्ले आसात.

मेंदवाच्या ट्यूमराचीं चडशीं लक्षणां अशीं:  तकली दुखप,  आळस, कुडीचे एके वटेन क्रमीक दुबळेपण वा पक्षाघात, नदर, उलोवप, आयकुपाक वा गिळपाचे प्रस्न,  मानसीक वा वागणूक बदलप,  खर मळमळ, ओंकारी वा न्हीद येवप.

ट्यूमराची सुवात आनी प्रकार हांचेर आदारून हीं लक्षणां एकटीं वा गटांत दिसूं येतात. आमकां सगळ्यांक जिवितांतल्या कांय वेळार तकली दुखताली. ट्यूमराक लागून जावपी तकली दुखप वेगळें दिसता, सकाळीं चड प्रमाणांत जाता, ओंकारी वा मळमळ हांचे कडेन संबंदीत आसता आनी काळा प्रमाण ती वाडटा. आळस सामान्यपणान जावंक शकतात, तुमच्या सगळ्या हातपांयांचेर परिणाम जावन दोळ्यांचे मणी वयर वचून तोंडाक फेण येवंक शकता वा तुमचे कुडीच्या एका विशिश्ट भागाचेर परिणाम जावंक शकतात. हीं लक्षणां दिसतकच न्यूरो तज्ञ दोतोराचो सल्लो घेवप बरे.

भुरग्यां सयत सगळ्या पिरायेच्या लोकांक मेंदवाच्या ट्यूमरांचो परिणाम जावं येता. लक्षणां, ट्यूमराचे प्रकार आनी उपचाराचे पर्याय वेगवेगळे आसूं येतात. पिराय, किरणोत्सर्गाचो संपर्क आनी क्वचितच प्रकरणांनी कुटुंबीक इतिहास हीं सगळीं तुमच्या मेंदवांत कॅन्सराचो ट्यूमर जावपाची शक्यताय वाडोवंक शकतात. सीटी वा एमआरआय स्कॅन ही तपासपाची मुखेल पद्दत. केन्ना केन्नाय आनीक चांचणी करची पडटली. तुमचो दोतोर कांय वेळार अतिरिक्त चांचणी करपाची शिफारस करूंक शकता. खंयच्याय मेंदवाच्या कॅन्सराची उपचार पद्दत ट्यूमराचो प्रकार, ताची सुवात, आकार आनी विस्तार तशेंच तुमची एकंदर भलायकी हांचेर आदारून थारतली.

सुरवेक तात्पुरती लक्षणां उणी करपाक वखदांचो उपेग करतात. तातूंत वेदनाशामक वखदां, मळमळ आनी ओंकारे आड वखदां, आळसा आड वखदां आनी ट्यूमरा भोंवतणची सुज उणी करपा खातीर वखदां आसूं येतात. 

मेंदवाचे ट्यूमर चड करून शस्त्रक्रिया करून काडटात. शस्त्रक्रिया करपाचो ध्येय आसतलो तो विकृत ट्यूमर शक्य तितलो काडून उडोवप. हें साध्य जालें ना जाल्यार किरणोत्सर्ग वा रसायनीक उपचाराची गरज आसूं येता. कवटींतल्या ल्हान बुराकांतल्यान बायोप्सी आनी फकत ट्यूमराच्या वाठाराचेर केंद्रीत रेडियोथेरपी अशे नवे उपचार पर्याय आतां करपाक मेळटात.

आदीं सांगिल्ले प्रमाण वैजकी मळार हेर शास्त्रां भशेन प्रगती जायत आसा. आतां आमचे कडेन मेंदवाच्या कॅन्सरा खातीरय नवी वखदां आनी केमो उपचार मेळटात. सुरक्षीत आनी चडांत चड ट्यूमर काडपाक आमकां मदत करपाक बरीं निदान साधनां उपलब्ध आसात. शस्त्रक्रिया उपकरणां आनी सूक्ष्मदर्शकांत आमी सुदारणा केल्यात.

मिथक आनी गैरसमज पयस करपा खातीर मेंदवाच्या ट्यूमरां विशीं जागृताय करप आनी सगळ्यांक शिक्षण दिवप म्हत्वाचें. मेंदवाच्या ट्यूमराचें निदान केल्यार सदांच निराशाजनक पूर्वानुमान दिसना हें आमी वळखुपाक जाय. चडशा परिस्थितींत शस्त्रक्रिये पयलीं आनी उपरांतचे उपचार, तशेंच इश्ट आनी कुटुंबांतल्यान बरो तेंको मेळप हें दुयेंतीक बरो जावपाक गरजेचें आसता.

– डाॅ. ओमकार चुरी,

सल्लागार न्यूरो  सर्जन

मणीपाल हाॅस्पिटल्स