भांगरभूंय | प्रतिनिधी
आदलो वस्ताद ब्राझिलान हांगा चालू आशिल्ले संवसारीक फुटबॉल सर्तीचे बाद फेरयेंत सुवात मेळयली. जी गटांतले मॅचींत ब्राझिलान स्वित्झर्लेण्डाक 1-0 अशा निसट्ट्या फरकान हारोवन फुडले फेरयेंतली सुवात निश्चीत केली.
ब्राझिलान फुडले फेरयेंतली सुवात निश्चीत केली आसली तरी ताका स्वित्झर्लेण्डा आड पयलो गोल करपाक खूब झुजचें पडलें. अखेरेक 83व्या मिनटाक कॅसेमिरोन मैदानी गोल करून ब्राझिलाचें खातें उगडलें.
ब्राझिलान आपले पयले मॅचींत सर्बियाक हारयिल्लो. अशे तरेन दोन जैता उपरांत ताचे स गूण जाल्यात आनी तो जी गटांत पयले सुवातेर आसा.
ब्राझिलान पयल्या अर्दांत बॉलाचेर आपलें नियंत्रण दवरपाचो यत्न केलो, तशेंच ताणें शॉर्ट पासिंगाच्या आदाराचेर सुरवाती सावन स्वित्झर्लेण्डाच्या गोलपोस्टाचेर हल्ले करपाक सुरवात केली. पूण, स्वित्झर्लेण्डान उत्कृश्ठ रितीन बचाव करून ब्राझिलाचीं आक्रमणां परतावन लायलीं. पयल्या अर्दांत ब्राझिलान प्रतिस्पर्धी गोलपोस्टाचेर पांच हल्ले केले. पूण, तांतूतले दोनूच शॉर्ट ऑन टार्गेट आशिल्ले.
दुसऱ्या अर्दांत ब्राझिलान आपल्या आक्रमणाची धार आनीक खर केली. ब्राझिलाच्या फॉरवर्ड खेळगड्यांनी सातत्यान स्वित्झर्लेण्डाच्या डीतली हालचाली वाडयल्यो. मजगतीं, 66व्या मिनटाक स्वित्झर्लेण्डाची गोलपोस्ट भेदपाक येस मेळ्ळें. पूण, रॅफ्रीन व्हीएआरच्या आदारान ऑफसायड आशिल्ल्याचो निर्णय दीत वनिकियसाचो गोल अवैध थारायलो. ते उपरांत ब्राझिलाक मॅचींतलो पयलो गोल करपा खातीर 82 मिनटां वाट पळोवची पडली. अखेरेक कॅसेमिरोन 83व्या मिनटाक रॉड्रिगोच्या पासाचेर मैदानी गोल करून ब्राझिलाचें खातें उगडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
