भांगरभूंय | प्रतिनिधी
स्ट्रायकर नेमार पंगडांत परतून आयिल्ल्यान घटसाण मेळिल्ल्या ब्राझिलान दक्षीण कोरियाक 4-1 अशा गोल फरकांनी हारोवन संवसारीक फुटबॉल सर्तीचे क्वॉर्टरफायनलींत सुवात मेळयली. क्वॉर्टरफायनलींत तो क्रोएशिया आड खेळटलो.
ब्राझिलान चारूय गोल पयल्या अर्दांत केले आनी दक्षीण कोरियाच्या आव्हानाचें वारेंच काडून घेतलें. ताका लागून जपाना उपरांत दक्षीण कोरियाच्या रुपान आशिया खंडांतल्या आनीक एका पंगडाचें आव्हान प्री-क्वॉर्टरफायनलींत सोंपलें.
पयल्या अर्दा परस दुसऱ्या अर्दांत दक्षीण कोरियान बरें प्रदर्शन करीत एक गोल लेगीत घालो.
ब्राझिलाची गोल करपाची सुरवात मॅचीच्या सातव्या मिनटा सावन सुरू जाली. ब्राझिल कोरियाच्या डी लागसार आशिल्लो. ह्या वेळार राफीन्हान नेमाराक पास दिलो. नेमारान डीचे मदीं आशिल्लो. बॉल ताच्या मुखा वयल्यान दावे वटेन आशिल्ल्या विनिशियस ज्युनियराच्या पांया कडेन गेलो. ताणें हळूच टच दिलो. खीण रावन अदमास घेवन थेट गोलपोस्टांत घालो.
13व्या मिनटाक ब्राझिलाक पॅनल्टी मेळ्ळी. ही संद नेमारान सादून आघाडी 2-0 अशी केली. कोरिया गोल करपाची संद सोदीत आशिल्लो. पूण, ताका तशी संद मेळूंक ना. मजगतीं, 29व्या मिनटाक रिचर्लिसनान उत्कृश्ट गोल करून स्कोर 3-0 केलो. हो सांघीक गोल खाशेलो ब्राझिल शैलींतलो आशिल्लो. रिचर्लिसनान हेड करीत बॉल मार्किनहोसा कडेन दिलो. ताणें कासेमिरा कडेन धाडलो. ताणें हलकसो पास दीत रिचर्लीसना कडेन धाडलो. जलद पासिंगेक लागून कोरियाची बचाव फळी मात्शीं विस्कळीत जाली. ताचो फायदो घेत रिचर्लिसनान बॉल जाळांत घालो.
36व्या मिनटाक पक्वेटान एक अफलातून गोल करून पयल्या अर्दांत ब्राझिलाचो स्कोर 4-0 असो केलो.
दुसऱ्या अर्दांत कोरिया वतीन 76व्या मिनटाक गोल जालो. हो गोल फाईक सेउंगान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
