भांगरभूंय | प्रतिनिधी
मडगांव, प्रतिनिधी : लोटलेचे खाजन जमनींतल्यान बोरये पुलाच्या कामाक शेतकारांचो विरोध आसा. सिमांकना खातीर अधिकारी येतले हें कळटांच नागरीक एकठांय येवन आंदोलन करून, शेतजमनींत पुलाक विरोध करतले अशें स्पश्ट केलें.
लोटलेच्या नागरिकांनी बिरेस्तारा सकाळीं परत बोरये पुलाचें बांदकाम करपी जाग्यार आंदोलन केलें. सिमांकन आनी भू संपादनाच्या कामा खातीर जे कंपनीक कंत्राट दिला ताचे अधिकारी सिमांकना खातीर येतले अशें कळटांच लोक घडणुके सुवातेर एकठांय जाले. बोरये पुलाची कसली गजाल आनी नेमको आराखडो कसो आसतलो हें समजपा खातीर गरजेचीं म्हायती मेळची अशी मागणी केल्या. मात ते विशीं सरकारान कसलीच म्हायती दिवंक ना. खाजन जमिनींच्या मदल्यान पुलाचें बांदकाम जाल्यार शेतां कशी रोंवपाचीं असो प्रस्न शेतकारांनी केलो. आदल्या प्रकल्पाचें काम पळयल्यार काम केल्या उपरांत शेतजमिनींत उदक सांचप, कामा वेळार कोयर उडोवपाच्यो घडणुको जातात आनी मागीर ती जमीन लागवडी खाला येना. अशें लोटले जावपाक दिवंचे नात. कितलेय फावटीं आंदोलन करचें पडल्यार पडूं, अशी भुमिका थळाव्या शेतकारांनी घेतल्या.
उपसरपंच सेलिना ब्रागांझा, आदले सरपंच झेविअर फर्नांडीस हांणीय ह्या आंदोलनाक फाटबळ दिलें.
लोकांच्या मनांतले दुबाव पयस करप गरजेचें: विजय सरदेसाय
बोरये पुलाक विरोध जाता. हो प्रकल्प कित्याक गरजेचो ह्या कारणा सयत सरकारान लोकां कडेन चर्चा करपाची गरज आसा. लोकांच्यो शेतजमनी घेवन पूल उबारपा परस पर्याय दिवप गरजेचें. समाजाच्या हिताचो प्रकल्प आशिल्ल्याचें पटोवन काम फुडें व्हरचें. ना जाल्यार लोकांच्या विरोधाक तोंड दिवचें पडटलें, अशें आमदार विजय सरदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
