भांगरभूंय | प्रतिनिधी
भांगरभूंय । प्रतिनिधी
फोंडेंः पारपतीवाडो- बोरये हांका बोरये पंचायत मंडळाक कसलीच म्हायती दिनास्तना पंचायत सचिवाक एका घराक घन नंबर दिला. ह्या घराक व्हो नंबर दिवपाक विरोध करपी कागाळ केल्ली आसनाय सचिवान मनमानी करून तो दिल्ल्यान ताचेर कारवाय करपाची मागणी पंच वांगडी विनय पारपती आनी हेर ग्रामस्थांनी एके पत्रकार परिशदेंत केल्या.
पंचायत मंडळाचे बसकेंत चर्चा करनास्तना घर नंबर दिवपाच्या सचिवाच्या कारभाराक लागून आपणे पंच वांगडी म्हणून राजिनामो दिला अशी म्हायती तांणी पत्रकारांक दिली. पारपतीवाड्या वयल्या जॅफ्रीन गोम्स हांणी एकल्याक घर नंबर दिवपाक आक्षेप घेतिल्लो. ताचेर कसलीच चर्चा करनास्तना पंचायत सचिवान घर नंबर दिवन सगल्यांक धपको दिला. घर नंबर दिवपा पयलीं पंचायत मंडळाचे बसकेंत चर्चा जावपाची गरज आशिल्ली. विशेश म्हणल्यार घर बांदनास्तनाच घर नंबर दिला. ही सुवात भाड्यान दिवपाचो यत्न घर नंबर दिल्ले व्यक्तीन सुरू केला. पंचायत प्रशासन संचालकान सचिवा आड कारवाय करपाक जाय. घर नंबर दिल्ल्याचो निशेध म्हणून आपणे आपल्या पंच वांगडी पदाचो राजिनामो सरपंच दुमिंगो वाझ हांचे कडेन दिला अशें पारपतीन सांगलें.
बोरये पंचायत सरपंच आनी सचीव सध्या गोंयां भायर आसात. ते परत आयल्या उपरांत ह्या प्रकरणात खुलासो करतले अशें सूत्रांनी सांगलें. पत्रकार परिशदेक पंच वांगडी सुनील नायक, सतीश नायक बोरका आनी हेर ग्रामस्थ हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
