भांगरभूंय | प्रतिनिधी
फोंडें, प्रतिनिधी: टॉप कोला- बोरये स्कुटरीचो धपको ट्रकाक बसून जाल्ल्या अपघातांत सतीश गावडे ( ४२, पाणीवाडो- बोरये) हांकां गोमॅकोंत उपचार चलतना मरण आयलें. हो अपघात आयज बिरेस्तारा सकाळीं ८.२० वरांचेर घडलो. अपघातांत मरण आयिल्ले सतीश गावडे हे फोंडें उपजिल्हाधिकारी कार्यालयाचे कर्मचारी. फोंडें पुलिसांनी ट्रक चालक सय्यद महमद रफीक ( २४, नावेली- मडगांव) हाका अटक केल्या.
पुलिसांनी दिल्ले म्हायती प्रमाण, बिरेस्तारा सकाळीं मडगांवच्यान जीए- ०८- यु- ७२८४ क्रमांकाचो मालवाहू ट्रक होंडा वतालो. टॉप कोला बोरी हांगाच्या अशीर रस्त्यार जीए – ०५- ई – ८१६५ क्रमांकाचे स्कुटरीचो धपको ट्रकाच्या कुशीक बसलो. हातूंत स्कुटर चालक सतीश हो गंभीर जखमी जालो. जखमीक १०८ ऍम्बुलन्सींतल्यान उपजिल्हो हॉस्पिटलांत व्हेलो. उपरांत चड उपचारा खातीर ताका गोमॅकोंत धाडलो. थंय उपचार चलतना तांकां मरण आयलें. फोंडें पुलीस निरीक्षक तुषार लोटलीकार हांच्या मार्गदर्शना खाला पंचनामो केलो.
सतीश गावडे हांचो सभाव मनमेकळो आशिल्लो. तांच्या मरणाचेर थळाव्यांनी दुख्ख उक्तायलां. तांचे फाटल्यान घरकान्न आनी एक ल्हान धूव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
