भांगरभूंय | प्रतिनिधी
म्हापशें: श्री देव बोडगेश्वर जत्रोत्सवांत 92 टन कोयराची निर्मिती जाली. हो सगलो कोयर म्हापशें पालिकेन उबारलो. जात्रा सोंपले उपरांत फेरयेंतल्या दुकानदारांनी उडयिल्लो हो सुमार 20 टन कोयर तीन दिसां भितर पालिकेक उबारचो पडलो.
अंदूं देव बोडगेश्वराचो जात्रोत्सव 12 दीस मनयलो. ह्या जात्रोत्सवांतले फेरयेंत एक हजारा परस चड दुकानां थाटिल्लीं. तशेंच सुमार 50 वयर केळी आनी फुलां विकपी आशिल्ले. ह्या सगल्यां कडल्यान दर दिसा सुमार स टन कोयराची निर्मिती जाताली. हातूंत दरेकी तीन टन ओलो आनी सुक्या कोयराचो आस्पाव आसा.
पालिके कडल्यान ओलो कोयर एकठांय करपा खातीर फेरयेचे सुवातेर 50 किलाची तांक आशिल्ल्या कोयरा पेटयांची वेवस्था केल्ली. तशेंच सुको कोयर दवरपा खातीर वाहनांची वेवस्था केल्ली. हातूंत दीसपट्टो कोयर उडोवप जातालें. 12 दीस जात्रोत्सवांतल्यान पालिकेन ओलो आनी सुको मेळून अदमाशेक 72 टन कोयर उबारून हो कोयर पालिकेच्या कोयरा प्रकल्पांत उडोवन ताचेर प्रक्रिया केली.
जाल्यार 15 वेर जात्रा सोंपले उपरांत सोमारा 16 वेर पालिकेन फेरयेंतली सगलीं दुकानां काडलीं. हीं दुकानां स्वता जावन कुशीक काडटना दुकानदारांनी दुकानांत निर्माण जाल्लो व्हड प्रमाणांतलो कोयर थंयच उडोवन दिलो. ताका लागून जात्रोत्सवाच्या मैदानार कोयरूच कोयर पातळ्ळो.
पालिका मंडळान सोमार ते बुधवार अशे तीन दीस अतिरिक्त कामगार वापरून पुराय कोयर एकठांय केलो. ह्या वेळार कांय समाजीक संस्थांनी लेगीत पालिकेक सहकार्य केलें. ह्या तीन दिसांत सुमार 20 टन सुको कोयर एकठांय करून तो पालिकेच्या कोयरा प्रकल्पांत व्हरून उडयलो.
देव बोडगेश्वर जात्रोत्सवा वेळार निर्माण जाल्लो सुमार 90 टन परस चड कोयर पालिकेन उबारलो. हे खातीर पालिकेक खूबशे कर्मचारी आनी वाहनांचो वापर करचो पडलो. हे फेरयेंतल्यान पालिकेन हजारांनी रुपयांचो शुल्क वसूल केल्लो आसलो तरी लेगीत दर वर्सा प्रमाण हे रकमे परस चड खर्च पालिकेक हो कोयर एकठांय करपी वाहनां आनी कर्मचाऱ्यांचेर करचो पडलो. दिल्ले मुजतींत फेरी काडपा सयत वेळारूच हो कोयर उबारून आमी वाठाराचें विद्रुपीकरण करूंक दिलें ना अशी म्हायती उपनगराध्यक्ष चंद्रशेखर बेनकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
