भांगरभूंय | प्रतिनिधी
पणजी : बोट धनी मंजुनाथ हरीकांत हांच्या खून प्रकरणांतल्या दुबावितांक धरपाक आगशी पुलिसांक येस आयलां. ह्या प्रकरणांत पुलिसांनी नागपूर हांगच्यान दोन दुबावीत कामगारांक अटक केल्या. तांचे कडेन खोलायेन चवकशी करप चालू आसा.
मुळाव्या तपासांत खून करपा फाटल्या नेमक्या कारणाची म्हायती पुलीस घेतात. दुबावितांक ताब्यांत घेतले उपरांत ह्या कामगारां कडल्यान अदीक म्हायती मेळोवन तपासाक वेग दिवपाचो यतन आगशी पुलीस करतात.
मजगतीं, आयतारा वयलें खून प्रकरण उक्तडार आयिल्लें. कांय नुस्तेंमार्यांक दर्यांत कूड उफेतना दिसून आयली.उपरांत ती कूड मंजुनाथ हरीकांत हांची आशिल्ल्याचें उक्तें जाल्ल्यान हांगा बरोच बोवाळ निर्माण जाल्लो.
मंजुनाथ आपल्या कामगारां सयत बोट घेवन नुस्तेंमारी खातीर गेल्लो. ह्या वेळार कामगारांनी ताचो खून करून ताची कूड दर्यांत उडयल्ली. उपरांत बोट दर्यादेगेर हाडून दवरून तांणी थंयच्यान पळ काडिल्लो. सद्या पुलिसांनी त्या कामगारांक अटक केल्या. हे विशीं पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
