भांगरभूंय | प्रतिनिधी
पणजी : नुस्तेमारीचो हंगाम सुरू जाल्ल्यान पोरण्या बोटींचेर शौचालय बांदपाक काय म्हयन्यांची मुजत मेळटली. ही मुजत 4 ते 5 म्हयन्या मेरेन दिवपाची तयारी आसा. शौचालय बांदपा पसून पुराय तरेन सूट मेळची ना, अशें नुस्तेमारी मंत्री नीळकंठ हळर्णकार हांणी स्पश्ट केलां.
पोरण्या बोटीचेर शौचालय बांदप बंधनकारक करचे न्हय, अशी मागणी अखील गोंय पर्सेसिन बोट धनी संघटणेचे अध्यक्ष हर्षद धोंड हांणी केल्या. हे विशीं संघटणे कडल्यान पत्र आयिल्ल्याचे मंत्री हळर्णकार हांणी सांगलें.
कामगार तशेंच बोटीचेर नितळसाण राखपा खातीर शौचालय गरजेचें आसा. बोटीचेर शौचालय बांदप आतांच शक्य जावचें ना. मागणेचो विचार करून शौचालय बांदपा खातीर काय म्हयन्याची मुजत दिवपाची तयारी आसा. चर्चा करून ही मुजत सरकार थारायतलो, अशें मंत्री हळर्णकार हांणी सांगलें. सरसकट शौचालय बांदपा पसून सूट मेळची ना, अशें मंत्री हळर्णकार हांणी बोट धनयांच्या मागणेचेर उलयताना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
