भांगरभूंय | प्रतिनिधी
वास्को, प्रतिनिधी: आल्त दाबोळे- बोगमाळो चौकांतलीं रस्त्या पोंदचीं उदकाचीं पायपां फुटतूच आसतात. ताका लागून हजारांनी लिटर उदकाचो इबाड जाता. हांचेर कितेंय उपाय करपाची गरज आसा, अश्यो प्रतिक्रिया वाहन चालक उक्तायतना दिसतात.
हांगचीं जमनी पोंदचीं उदकाचीं पायपां सेगीत फुटतूच आसतात. देखून तीं सारकीं करपा खातीर रस्तो खणिल्ल्यान रस्तो फोंडकुलांनी भरला आनी वयर सकयल जाल्लो पळोवपाक मेळटा. म्हणून चालकांक बरेच त्रास सोंसचे पडटात.
आल्त दाबोळी- बोगमाळो चौकांतल्या उदकाच्या पायपांतलें उदक रस्त्या वयल्यान व्हांवता. हीं उदकाचीं पायपां कित्याक फुटतात, ताचें कारण समजप कठीण जालां. तशेंच हांगा कांय जाण नो पार्कींग आसून लेगीत आपलीं वाहनां उबीं करून दवरतात. वाहन चालकांक त्या फोंडकुलांतल्यान आपलीं वाहनां व्हरचीं पडटात. हे विशीं संबंदितांनी कायमचे उपाय करपाची गरज आसा. जाका लागून वाहनचालकांची जावपी गैर वेवस्था पयस जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
