भांगरभूंय | प्रतिनिधी
गोंयचो फुटबॉल प्रशिक्षक डॅरील डिसोझान बंगळुरूंत आशिल्ल्या बोका ज्युनियर्स फुटबॉल स्कूल-इंडियाच्या येसांत मोलादीक योगदान दिलां. फाटलीं दोन वर्सां ते ह्या फुटबॉल स्कुलाचे तंत्रीक संचालक म्हणून काम पळयता.
कर्नाटक राज्य फुटबॉल असोसिएशनाच्या (केएसएफए) युवा पिराय गटांतल्या तीन सर्तींनी बोका ज्युनियर्स फुटबॉल स्कुलान वस्तादपण जोडलें. ह्या स्कुलांनी डॅरील एप्रील 2020त रुजू जाले. 2021-22 हंगामांत ह्या पंगडान 14 वर्सां पिराये सकयल्या पिराय गटांत वस्तादपण जोडलें. हाचे खेरीत केएसएफए 8 वर्सां पिराये सकयले सर्तींत लेगीत जैतिवंत थारले. बोका ज्युनियर स्कूल पंगडान डबल पास डॅव्हलपमॅण्ट लिगेच्या 10 वर्सां पिराये सकयले सर्तींत वस्तादपण जोडलें. 12 वर्सां पिराये सकयल्या पंगडान सेमी फायनली मेरेन, जाल्यार 17 आनी 10 वर्सां पिराये सकयल्या लिगांनी क्वॉर्टर फायनली मेरेन मजल मारली.
डॅरील डिसोझाच्या मार्गदर्शनाखाला बोका ज्युनियर्स फुटबॉल स्कूल-इंडियाच्या तीन खेळगड्यांची भारताच्या गोंयांत जाल्ले 17 वर्सां पिराये सकयल्या पंगडाच्या शिबिरांत निवड जाली.
खेळगड्यांची योग्य उदरगत ही म्हत्वाची आसता. युवा खेळगड्यांक हाची जाणीव करून दिवप, प्रशिक्षणांत ते कितें करतात आनी कित्याक करतात हें तांकां समजुपाक जाय. प्रशिक्षक म्हणून दरेक खेळगड्याचे चुकीक योग्य तरेन संयमान हाताळप गरजेचें आसा. तांच्यो चुकी पयस करप म्हत्वाचें आसता. तुमी कशे तरेन विचार करतात. तुमचे विचार हें तुमचें सगल्यांत व्हड अस्त्र आसता. पंगड म्हणून खेळटना फाटीं न सरपाची वृत्ती खेळगड्यां मदीं हाडप खूब म्हत्वाचें आसता अशें डॅरेल हाणें म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
