भांगरभूंय | प्रतिनिधी
बदल्यात दोन गवे वतले भोपाळाक
भांगरभूंय । प्रतिनिधी
पणजीः बोंडला प्राणी अभयारण्यांत रोखडीच वांस्वेलाची जोडी येवपाची आसा. थंयचे दोन गवे भोपाळ- मध्यप्रदेशांतांतल्या प्राणी संग्राहलयांत व्हरतले. हे संबंदांतली प्रक्रिया निमाण्या पांवड्यार आसा. फुडल्या कांय म्हन्यांत भोपाळच्यान वांस्वेलाची जोडी हाडटले. सहाय्यक रान संरक्षक आनंद जाधव हांणी दिल्ले म्हायती प्रमाण, केंद्रीय प्राणी संग्रहालय प्राधिकरणान गोंयांत वांस्वेलाची जोडी दिवपाक मंजुरी दिल्या. ताका लागून भोपाळ मध्यप्रदेशांतली वांस्वेलाची जोडी बोंडला प्राणी संग्रहालयांत हाडटले. ताच्या बदल्यात बोंडला प्राणी संग्रहालयांत ज्या जनावारांची संख्या चड आसा, तातूंतलीं दोन जनावरां भोपाळ प्राणी संग्रहालयाक दिवचे पडटले. ते प्रमाण बोंडलाचे दोन गवे थंय धाडपाचो निर्णय जाला. हे संबंदांतली कागदोपत्री सोपस्कार फुडल्या कांय म्हयन्यांनी पुराय जातले आनी वांस्वेलाची जोडी बोंडला प्राणी संग्रहालयांत येतली, अशें जाधव हांणी सांगलें.
बोंडलाचें रूप बदलतलें
बोंडला प्राणी संग्रहालयाचें रूप बदलपाची प्रक्रिया सुरू जाल्या. ते खातीर मास्टरप्लानूय तयार केला. बोंडला प्राणी संग्रहालयांत सध्या आशिल्ले पांजरे तशेंच हेर कांय साधनसुविधा पोरण्यो जाल्यात. त्यो बदलून ह्या प्राणी संग्रहालयाचो दर्जो वाडयतले, अशें आनंद जाधव हांणी सांगलें. गोंयांत दर वर्सा भेट दिवपी देशी- विदेशी पर्यटक बोंडला प्राणी संग्रहालयाक चुकानासतना भेट दितात. ताका लागून दर वर्सा तातूंतल्यान सरकारान सरासरी दोन कोटींचो महसूल मेळटा. चडांत चड पर्यटकांनी संग्राहलयाक भेट दिवची, हे खातीर पर्यटकां खातीर गरजेच्यो सगळ्यो साधन सुविधाय थंय उपलब्ध करतले, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
