भांगरभूंय | प्रतिनिधी
खबरां संस्था
मुल्लानपूरः बॉलरांनी शेक गाजयल्ल्या आयपीएलांतवाते 37 वे मॅचींत गुजरात टायटन्सान पंजाब किंग्सांचेर 4 विकेटींनी जैत मेळयलें. बॉलरांक अनूकुल आशिल्ले महाराजा यादविंद्र सिंग स्टेडियमाचे खेळपट्टेर 142 व्हो स्कोर लेगीत व्हडलो दिवपाक लागलो आनी गुजरात टायटन्साक तो हुबवा खातीर स विकेटीचें मोल दिवचें पडलें.
आयतारच्या आयपीएलांतल्या डबल हेडरचे दुसरे मॅचींत पंजाब किंग्सान आपल्या डावांत 20 ओव्हरींत 142 धांवड्यो केल्यो. साई किशोर (4 विकेटी), मोहित शर्मा (2 विकेटी) आनी नूर अहमद (2 विकेटी) ह्या बॉलरां सामकार तांका देडशें धांवड्यांचोय टप्पो हुबप शक्य जालें ना. कॅप्टन सॅम कुरियन आनी प्रभसिमरन हांणी तांच्या डावाची सुरवात बरी केली. पंगडाच्यो 52 धांवड्यो जाल्ल्यो तेन्ना मोहित शर्मान प्रभासिरमनाक 35 धांवड्यांचेर कॅच आवट केलें आनी हांगच्यान तांच्या डावाची घसरगुंडी सुरू जाली.
पंगडाचो शेंकडो शेंकडो जायचे पयलीं तांची स्थिती 7 आवट 99 अशी जाली. सॅम कुरियन (20), हरप्रीत बार (29), हरप्रीत सिंग (14), जितेश शर्मा (13) हे सोडल्यार तांचे बाकीचे बॅट्समन दोन आंकडी धांवड्यो करपाक शकले ना. 1 आवट 52 वयल्यान 10 आवट 142 अशी तांची स्थिती जाली. 33 धांवड्यांत 4 विकेटी घेवन साई किशोर व्हो पंजाब किंग्साचो कर्दनकाळ थारलो. मोहीत शर्मा आनी नूर अहमद हांणी दरेकी दोन आनी कॅप्टन कुरियन हांची विकेट घेवन राशीद खानान साई किशोरा वांगडा पंजाबाचो डाव सोपयलो.
कांय वेंचीक बॅट्समनानी पंजाबाक 142 धांवड्यां मेरेन व्हेलें तशेंच गुजराताच्या कॅप्टन शुममन गील (35), साई सुदर्शन (31) आनी राहुल तेवतिया (नाबाद 36) हांणी पंगडाक जैतिवंत केलें. गुजराताच्या डावाची सुरवात बरी जाली पूण उपरांत पंजाबा भशेन तांचो डाव कोसळपाक लागलो. हर्षल पटेल (3), लिव्हिंगस्टोन (2) आनी अर्शदीप सिंग (1), सॅम कुरियन (1) ह्या बॉलरांनी ही किमया केली पूण ते गुजराताचे जैत आडावपाक शकले नात.
पयले विकेटी खातीर 66 धांवड्याची सलामी दिवंन शुभमन गील आवट जालो. उपरांत शंबर जाय मेरेन 4 विकेटी पडल्यो. गुजराताच्या जैताचे स्रय चड करून राहुल तेवतियाक दिवपाक जाय तांणे एक वटेन नाबाद खेळी केल्ल्यान गुजराताक हरशी सोपें दिसपी हे जैत स गड्याचें मोल दिवंन मेळोवपाक फावो जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.