भांगरभूंय | प्रतिनिधी
येजमान भारत आनी ऑस्ट्रेलिया ह्या पंगडां मदीं आयज दुसरी टी-20 मॅच हांगाच्या ग्रिनफिल्ड इंटरनॅशनल स्टेडियमाचेर जातली. पांच मॅचींचे माळेंत भारत सध्या 1-0 असो मुखार आसा.
भारत आघाडी वाडोवपाच्या यत्नांत आसतलो. पूण, बॉलरांक आपले तांकी प्रमाण बरें प्रदर्शन करचें पडटलें. फाटले मॅचींत बॉलर सामके म्हारग थारिल्ले. हातूंतल्यान धडो घेवन आपल्या प्रदर्शनांत तांकां विविधताय हाडची पडटली.
फकत मुकेश कुमारान सगल्यां परस बरें प्रदर्शन केल्लें. निमाणे ओव्हरींत ताणें जबरदस्त बॉलींग केल्ली. ताणें फकत पांच धांवड्यो दिल्ल्यो. हे ओव्हरींत एक नो बॉल आनी फ्री हिट हाचो लेगीत आस्पाव आशिल्लो.
विशाखापट्टणमांत भारतान दोन विकेटींनी जैत जोडिल्लें. ते मॅचींत धांवड्यांचो पावस पडिल्लो. दोनूय पंगडांच्या बॉलरांनी खूब धांवड्यो दिल्ल्यो.
आयचे मॅची खातीर तयार केल्ले ग्रिनफिल्ड इंटरनॅशनल स्टेडियमाचे खेळपट्टीचेर लेगीत धांवड्यांचो पावस पडुये. ताका लागून भारताच्या बॉलरांक सांघीक रितीन प्रदर्शन करपाची गरज आसा. कारण दरेक खेपे व्हड मोखीचो येसस्वी रितीन फाटलाव करप तितलें सोंपे ना.
पयले मॅचींत फास्ट बॉलर अर्शदीप सिंगान 10.25 आनी प्रसिद्ध कृष्णान 12.50चे सरासरीन धांवड्यो दिल्ल्यो. जाल्यार स्पिनर रवी बिश्नोईन 13.50 प्रती ओव्हरीन धांवड्यो दिल्ल्यो. फकत मुकेश कुमार लयेंत दिसतालो. पूण, ताका एकूय विकेट मेळूंक ना.
टी-20 प्रकारांत बॉलरां खातीर खाशेलें अशें कांय नासता. पूण, ह्या तिनूय बॉलरांचे बॉलिंगेंत विवीधतायेचो उणाव दिसलो. भारताक आघाडी घेवपाक जाय जाल्यार ह्या विभागांत सुदारणां करपाची गरज आसा. भारताच्या बॉलरां खातीर अशें करप कठीण आसतले अशें दिसना. मुकेश कुमारान पयले मॅचींत करून दाखयलां. दुसऱ्या बॉलरांक लेगीत ताच्या पावलार पावल दवरून मुखार वचपाक जाय. भारताच्या खेळगड्यांची लय इबाडपा फाटलें एक कारण म्हणल्यार सगले खूब दिसांनी आंतरराष्ट्रीय मॅचींत खेळटा. पूण, खेळगड्यांक सदांच सर्वोत्कृश्ट प्रदर्शन करपाक तयार रावपाची गरज आसा.
फकत गुगलीचेर निंबून रावप शक्य ना हें बिश्नोईक कळपाक जाय. ताका आपले बॉलिंगेंत बदल करपाची गरज आसा. हालींच सोंपिल्ले संवसारीक वन डे क्रिकेट सर्तींत भारताच्या पंगडाचो वांगडी आशिल्ल्या प्रसिद्ध कृष्णान नॅट सरावांत उत्कृश्ट बॅट्समनांक बॉलींग घाल्या. पूण, ताचे बॉलिंगेंत नवें अशें कांयच दिसना.
बॅटींग विभागांत मुखेली सुर्यकुमार यादव, ईशान किशन, रिंकू सिंग आनी यशस्वी जयस्वाल हाणें बरें प्रदर्शन केलां. तांच्या कडल्यान सातत्यान अशा प्रदर्शनाची आस्त पंगडाक आसतली. पयले मॅचींत धांवबाद जावपी ऋतुराज गायकवाड आनी तिलक वर्मा बरी बॅटींग करपाक इत्सूक आसतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
