भांगरभूंय | प्रतिनिधी
भांगरभूंय । प्रतिनिधी
बेळगांवः कर्नाटकाचे मुख्यमंत्री बसवराज बोम्मय हांणी आयतारा बेळगांवांतल्या सगल्यांत व्हड बीएससी टेक्टटायल मोलाचें उक्तावण केलें. गोंयचे मुख्यमंत्री डॉ प्रमोद सावंत कांय कारणांक लागून हे कार्यावळीक हाजीर रावपाक शकले नात. कर्नाटक मंत्रिमंडळातले मंत्री, आमदार, खासदार तशेंच केएलई सोसायटीचो अध्यक्ष डॉ प्रभाकर कोरे कार्यावळीक हाजीर आशिल्ले.
बेळगांव जिल्ह्यांतल्या सगल्यांत व्हड शोरूमाचें उक्तावण करतना म्हाका खोस भोगता. कर्नाटक, गोंय आनी महाराष्ट्रांतल्या लोकांक आपले पसंतीचे कपडे विकते घेवपाक एक बरी संध ह्या मॉलाक लागून मेळटली असो विस्वास मुख्यमंत्री बोम्मय हांणी ह्या वेळार उक्तायलो. आपल्या दर्जेदार उत्पादन आनी परवडपी दरांत वस्त्रप्रावरणाचो वेवसाय करून बीएससी समुहान 1938 सावन लोकां मदीं नामना जोडल्यांत अशें तांणी सांगलें.
बीएससी समूह हेर कडेन हो मॉल उबारपाक पळयतालो. मात बेळगांव आनी गोंयांतल्या लोकांची गरज मतींत घेवन आपणे तांकां बेळगांव शारांत तो सुरू करचो अशी सूचोवणी केली आनी तांणी ती मानून घेतली अशें डॉ प्रभाकर कोरे हांणी सांगलें. दावणगिरीत आशिल्ल्या तांच्या मॉला परस ह्या मॉलाक चड गिरायक मेळटलें हाची आपूण खात्री दितां अशें तांणी सांगलें.
बीएससी व्हो ब्रँड आतां सगल्यांचे वळखीचो जाला. आमच्या समुहातले पयले पिळगेचे लोक गावांगावांनी वचून कपडे विकताले. दावणगिरींत एक ल्हान दुकान सुरू केलें. त्या दुकानांतल्यान सुरवात करून आयज बीएससी समुहाचो वड जाला अशें संचालक बी सी चंद्रशेखर हांणी आपल्या प्रस्ताविकांत सांगलें.
मुख्यमंत्री बोम्मय हांणी मॉलांतल्या सगल्या विभागांत वचून पळोवणी केली. एक लाख चौखण फुटांत हो मॉल आसा. उक्तावण कार्यावळीक मंत्री उमेश कट्टी, बी ए बसवराज, खासदार मंगला अंगडी, आमदार अनिल बेनाके, लक्ष्मी हेब्बाळकर, दुर्योधन अहोले, संचालक बी उमापती, बीसी शिवकुमार, बी सी विवेक, आनी हेर मानेस्त हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
