भांगरभूंय | प्रतिनिधी
जोयडा : बेळगांव-गोंय राष्ट्रीय महामार्गावेल्या खानापूर ते अनमोड मजगतीं सुरू आशिल्ल्या सुमार ५४ किलोमीटर लांबायेच्या रस्त्याच्या दोट्टीकरण कामाची मे २०२६त मुजत सोंपता. ही मुजत सोंपूनय प्रत्यक्षांत रस्त्याचें काम आजूनय अर्दवटूच आसा. खुबश्या सुवातांचेर उड्डाणपूल, पूल, राखणे वणट आनी रस्त्याचीं कामां पुराय जावंक नाशिल्ल्यान रस्त्याचेर व्हडलीं फोंडकुलां पडल्यांत. ह्या फोंडकुलांनी माल व्हरपी ट्रकां वांगडा हेर घडणुको आडकून पडपी घडणुकां मदीं वाड जाल्या. ही परिस्थिती अशीच कायम उरल्यार ह्या पावसांत रामनगर-गोंय मार्ग परत येरादारी खातीर बंद जावपाचो धोको निर्माण जाला.
गोंय आनी कर्नाटकाक जोडपी हो राश्ट्रीय म्हामार्ग वेपारी, उद्देग आनी पर्यटना खातीर खूब म्हत्वाचो. दर दिसा ह्या मार्गावेल्यान हजारांनी मालाचे ट्रक, प्रवासी बशी, खाजगी वाहनां आनी पर्यटक वतात. पूण फाटलीं आठ वर्सां चालू आशिल्लें दोट्टीकरणाचे काम अजून पुराय जावंक ना. ताका लागून दर पावसांत वाहन चालकांक हांगच्यान जीव धोक्यांत घालून प्रवास करचो पडटा.
ह्या प्रकल्पाच्या सुरवातीच्या टप्प्यांत डीबीएल कंपनीन फकत दोन वर्सांनी सुमार अर्दें काम पुराय केल्लें. देखून उरिल्लें कामूय बेगीन पुराय जातलें अशी अपेक्षा आशिल्ली. पूण ते उपरांत कंत्राटदार बदलप, कामाची गती मंद, प्रशासकीय अडचणी आनी हेर वेगवेगळ्या कारणांक लागून प्रकल्पाक कळाव जालो. ताका लागून आठ वर्सां उपरांत लेगीत हो म्हामार्ग पुराय जावंक ना.
हें दोट्टीकरणाचें काम मार्च २०२४ वर्सा सुरू जाल्लें आनी तें मार्च २०२५ मेरेन पुराय जातलें अशें आशिल्लें. पूण संबंदीत कंत्राटदाराक काम वेळार पुराय करूंक नाशिल्ल्यान केंद्र सरकारान सुमार देड कोटी रुपया दंड घालो. ते उपरांत खंयचेय परिस्थितींत मे २०२६ मेरेन उरिल्लें काम पुराय करपाची स्पश्ट सुचोवणी दिली. पूण मे म्हयनो सोंपलो आनी जुलय सुरू जालो तरी परिस्थितींत व्हडलोसो बदल जावंक ना.
रामनगर ते अनमोड मजगतीं जायत्या सुवातांचेर फ्लायओव्हर, ल्हान व्हड पुल आनी राखणे वण्टींचें काम आजूनय अपूर्ण आसा. ह्या सुवातेर तात्पुरते रस्ते तयार केल्यात. व्हड पावसाक लागून ह्या रस्त्यांचेर खोल फोंडकुलां तयार जाल्यांत आनी ते पुरायेन उदका पोंदा गेल्यात. हाका लागून वाहन चालकांक फोंडकुलांचो अदमास येना. उदकाक लागून रस्त्याच्यो कडोय दुबळ्यो जाल्ल्यान जड वाहनां येवन फोंडकुलांनी आडकून उरतात.
ह्या निश्काळजीपणाची आनीक एक देख आयतारा सकाळीं रामनगरा लागसार पळोवपाक मेळ्ळी. गोंयांतल्यान कर्नाटकाचे वटेन येवपी माल येरादारी ट्रक अर्दवट बांदकामाच्या सुवातेर खोल फोंडकुलांत अडकलो. ट्रकाचो सकयलो भाग जमनीक तेंकिल्ल्यान वाहन रस्त्या मदींच बंद पडलें. हाका लागून कांय काळ येरादारीची कोयंडी निर्माण जाली. निमाणें क्रेनीचे मजतीन ट्रक भायर काडलो आनी येरादरी सुरळीत जाली. हे घडणुकेंत कोणाक कांय जावंक ना. मात ही घडणूक महामार्गावेली सध्याची परिस्थिती दाखोवन दिता.
थळावे नागरीक आनी वाहनचालकांच्या म्हणण्या प्रमाण, काम सुरू आशिल्ले सुवातेर गरजेचे शिकावणी दिवपी तखटे, सुरक्षिततायेचे उपाय आनी रातची उजवाडाची वेवस्था सामकी अपुर्ण आसा. पावस सुरू जावचे पयलीं धोको निर्माण करपी सुवातेर फोंडकुलां पुरोवप आनी तात्पुरती दुरुस्तीय संबंदीत यंत्रणान करूंक ना. हाका लागून सदांच वाहनचालकांक जीव मुठींत धरून प्रवास करचो पडटा.
ह्या म्हामार्गाच्या कामाचेर नदर दवरपी भारतीय राष्ट्रीय म्हामार्ग प्राधिकरणान हे गंभीर परिस्थिती कडेन आडनदर केल्ल्याचो आरोप मोटार चालक आनी थळावे नागरीक करतात. मुजत सोंपली, दंड घेतलो, पूण काम पुराय जावंक ना. रस्ते अपूर्ण, धोक्याचे खड्डे आनी अपघाताच्यो घडणुको वाडत आशिल्ल्यान नागरिकांनी तिडक उक्तायल्या. बेळगांव-गोंय राष्ट्रीय म्हामार्गाची कोणाकूच काळजी ना अशीच भावना आतां मोटार चालक उक्तेपणान उक्तायतात.
फाटल्या आठ वर्सां सावन चलत आयिल्ल्या ह्या दोट्टीकरणाच्या कामाक लागून खानापूर-आनमोड वाठारांतल्या नागरिकांक, वेपारी आनी मोटार चालकांक खूब त्रास सोंसचे पडल्यात. दर पावसांत ह्या मार्गाचेर येरादारी खंडीत जाता, गाडयो अडकतात, अपघात जातात आनी असो वेळ येता जेन्ना येरादारीची कोयंडी वरभर तिगता. सध्याची परिस्थिती पळयल्यार ह्या पावसाच्या हंगामांत रामनगर-गोंय मार्ग परतून बंद जावपाचो धोको आसा. हाका लागून यंत्रणांनी उरिल्लें काम झुजां पांवड्यार पुराय करून धोक्याच्या सुवातांची बेगोबेग दुरुस्ती करची. जर फुडाराक हांगा व्हड घडणुक घडल्यार ताची पुरायेन जापसालदारी संबंदीत यंत्रणांचेर आसतली, अशी खर प्रतिक्रिया वाहनचालक आनी थळावे उक्तायतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
