भांगरभूंय | प्रतिनिधी
भांगरभूंय । प्रतिनिधी
बेळगांवः महाराष्ट्रांतल्या दोन मंत्र्यांक बेळगांव जिल्ह्यांत येवपाक बंदी घातिल्ल्यान मंगळारा बेळगांव तशेंच शीम वाठारांत तणावाचें वातावरण पातळिल्लें. कांय कडेन हिंसाचाराच्यो घडणुको जाल्यो. मंगळाराक सकाळी कर्नाटका रक्षण वेदिकाच्या वावुरप्यांनी पुणे- बंगळुरू म्हामार्गार हिरेबागवाडी टोल नाक्यार महाराष्ट्रांतल्यान आयिल्ल्या स ट्रकांचेर फातोर मोखून मारले.
महाराष्ट्र एकीकरण समितीन कोल्हापूर आनी बेळगांव जिल्ह्यांत निदर्शना केल्ल्यान कर्नाटक- महाराष्ट्र शीम वाद परत जडार पडपाक लागला. कर्नाटक रक्षण वेदिकाचो अध्यक्ष नारायण गौडा समर्थकां सयत बेळगांवांत राणी चन्नम्मा सर्कला कडेन निदर्शना करपाक येतना हिरेबागवाडी नाक्यार पुलिसांनी तांकां आडायलें.
शीम वाठारांत तणाव वाडपाक लागल्ल्यान शंभूराज देसाय आनी चंद्रकांत पाटील ह्या महाराष्ट्राच्या मंत्र्यांनी मंगळाराक बेळगांवात येवपाचो बेत रद्द केलो. बेळगांव जिल्हो प्रशासनात तांकां बेळगांवांत येवपाक बंदी घातिल्ली. बेळगांव शारांत मंगळाराक कडक पुलीस बंदोबस्त दवोरिल्लो. महाराष्ट्र एकीकरण समितीच्या कांय फुडाऱ्यांक पुलिसांनी मंगळारा सांजे ताब्यांत घेतिल्ल्यान वातावरच चड तणावग्रस्त जाल्लें. कोल्हापूरच्या शिवसेना वावुरप्यांनी कोंगनोळी हांगच्यान बेळगांवांत येवपाचो यत्न केलो. मात पुलिसांनी तांकां आडायले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
