भांगरभूंय | प्रतिनिधी
भांगरभूंय । प्रतिनिधी
बेळगांवः बेळगांव शारांत आशिल्ल्या दुकानाचे बोर्ड 60 टक्के ह्या प्रमाणांत कन्नड भाशेंत लावपाची कर्नाटक सरकारान केल्ले सक्तीक कर्नाटक उच्च न्यायालयान अंतरीम स्थगिती दिल्या. अशे बोर्ड लायले ना जाल्यार बोर्ड काडून उडोवपाचे वा दुकानांत सील लावपाचें बेगोबेग बंद करपाचो आदेश न्यायालयान दिला आनी फुडली सुनावणी 22 मार्चाक दवोरल्या.
कर्नाटक सरकारान कन्नड भाशा सर्वंकश उदगरद कायदो 2022 च्या कलम 17 (6) खाला बेळगांवांत दुकानाचे बोर्ड 60 टक्के प्रमाणांत कन्नड भाशेंत लावपाची सक्ती केल्ली. जे दुकानदार अशे बोर्ड लायनांत तांची दुकाना सील करपाक म्हापालिका प्रशासनाक सांगल्लें. ह्या आदेशाक भारतीय रिटेलर्स असोसिएशन कर्नाटक उच्च न्यायालयांत आव्हान दिल्लें. न्यायालयाच्या आदेशान दुकानदारांक थाकाय मेळ्ळ्या.
न्यायमूर्ती एम नागप्रसन्ना हांणी कन्नडांत नाशिल्ले बोर्ड काडचे न्हय तशेंच दुकानां सील करचीं न्हय असो आदेश आपल्या अंतरीम आदेशांत दिला. 60 टक्के कन्नड सक्ती लागू करपा खातीर वेपारी आस्थापना बंद करपाचो कर्नाटक सरकाराचो उद्देश ना अशें राज्याचो अॅडव्होकेट जनरल शशी किरण शेट्टीन न्यायालयाक सांगलें. ताची दखल न्यायमूर्तीक घेतली. कन्नड सक्तीची कार्यवाही बेळगांव म्हापालिका आनी जिल्हो प्रशासनात सुरू केल्ल्यान दुकानां, रेस्टॉरन्ट, शोरूम आनी हेर आस्थापनांची व्हडा प्रमाणात गैरसोय जावपाक लागली. ताचें बोर्ड काडून उडोवपाक वा दुकानां सील करपाची कारवाय सुरू जाली. न्यायालयाच्या आदेशा उपरांत बेळगांवचो उपायुक्त डॉ नितेश पाटील हांणी ही कार्यवाही थांबोवपाचो आदेश दिलो.
महाराष्ट्र एकीकरण समितीन कर्नाटकाच्या कन्नड सक्ती आदेशा आड बेळगांव म्हापालिका अधिकाऱ्यांक निवदेन भेटोवन विरोध केल्लो. बेळगांव मार्केटांत गोंय आनी महाराष्ट्राच्या शीम वाठारातले लोक व्हडा प्रमाणांत येतात. ते खातीर मराठी आनी इंग्लिश भाशचो उपेग तांचे खातीर बऱ्याक पडटा ही गजाल तांणी अधिकाऱ्यांचे नदरेक हाडून दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
