भांगरभूंय | प्रतिनिधी
चिक्कोडींतल्यान काँग्रेसीच्यो प्रियांका जारकीहोळी जैतिवंत
उत्तर कन्नडांतल्यान भाजपाचे विश्वेश्वर हेगडे कागेरी हांचें जैत
बेळगांव: प्रतिश्ठा पणाक लावन लडिल्ल्या बेळगांव, चिक्कोडी आनी कारवार लोकसभा वेंचणुकेचे निकाल सांजवेळा 6 वरांचेर जाहीर जाले. बेळगांवच्यान भाजपाचे जगदीश शेट्टर, चिक्कोडींतल्यान काँग्रेसीच्यो प्रियांका जारकीहोळी जाल्यार उत्तर कन्नड मतदारसंघांतल्यान भाजपाचे विश्वेश्वर हेगडे कागेरी वेंचून आयले.
बेळगांव लोकसभा मतदारसंघांतल्यान भाजपाचे जगदीश शेट्टर 173730 मतांनी जैतिवंत जाले. चिक्कोडी मतदारसंघांतल्यान व्हड बदल घडून बेळगांव जिल्ह्याचेर वर्चस्व आशिल्ल्या जारकीहोळी कुटुंबांतली 27 वर्सां पिरायेची तरणाटी प्रियांका जारकीहोळी हांणी दोन फावटी खासदार आशिल्ल्या भाजपाचे अण्णासाहेब जोल्ले हांका हारयलो. प्रियांका जारकीहोळी ह्यो 92655 मतांनी जैतिवंत जाल्यो. तांकां 710823 आनी अण्णासाहेब जोल्ले हांकां 618168 मतां पडलीं.
उत्तर कन्नड (कारवार) लोकसभा मतदारसंघांतल्यान भाजपाचे विश्वेश्वर हेगडे कागेरी हे दोन लाखा परस चड मतांनी जैतिवंत जाले.
बेळगांव लोकसभा मतदारसंघांत वट्ट 13 उमेदवारांनी आपले नशीब आजमायलें. हातूंत भाजपाचे जगदीश शेट्टर आनी काँग्रेस उमेदवार मृणाल हेब्बाळकर हांचे मदीं मुखेलपणान लडत जाली. हातूंत जगदीश शेट्टर हांकां 750949 मतां मेळ्ळीं आसून बायलां आनी भुरगीं उदरगत मंत्री लक्ष्मी हेब्बाळकर हांचे पूत मृणाल हेब्बाळकर हांकां 577219 मतां मेळ्ळीं. महाराष्ट्र एकीकरण समितीचे महादेव पाटील हांकां 9425 मतांचेर समाधान मानचें पडलें.
कारवार लोकसभा मतदारसंघांतल्यान भारतीय जनता पक्षाचे विश्वेश्वर हेगडे कागेरी हे 294553 मतांनी वेंचून आयले. तांणी भाजपाचो किल्लो राखलो. हातूंत विश्वेश्वर हेगडे कागेरी हांकां 660979 मतां जाल्यार काँग्रेसीचे उमेदवार डॉ. अंजलीताई निंबाळकर हांकां 366426 मतां मेळ्ळीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
