भांगरभूंय | प्रतिनिधी
फोंडें, प्रतिनिधी ः आयज सकाळीं सुमार 6 वरांचेर एका अनवळखी मनशान स्कुटरी वयल्यान वचपी एकल्याचेर फारपेट करुन थंयच्यान पळ काडलो. हे घडणुकेंत सचिन कुट्टीकार (33) गंभीर जखमी जालो. ताका उपचारा खातीर जीएमसींत दाखल केलां. ही धक्को दिवपी घडणूक फोंडें तालुक्यांतल्या बेतोड्यां जंक्शना लागसार घडली. पुलिसांनी तपास सुरु केलां.
पुलिसांनी दिल्ले म्हायती प्रमाण आयज सकाळीं सचिन GA- 05- V- 6563 क्रमांकाच्या स्कुटरी वतालो. बेतोड्यां जंक्शना लागीं पावतकच एका अनवळखी मनशान फाटल्यान ताचेर फारपेट करुन थंयच्यान पळ काडलो. फारफेटाच्या आवाजाक लागून वाठारांतले लोक भियेले आनी रोखडीच पुलिसांक म्हायती दिली. ते उपरांत जखमी सचिनाक जीएमसींत दाखल केला आनी ताचेर उपचार सुरू आसात.
मजगतीं, हे घडणुकेची म्हायती मेळटकच दक्षिण गोंय पुलीस अधीक्षक सुनीता सावंत सयत हेर पुलीस घडणूक सुवातेर हजर जाले. पुलिसांनी पयलीं त्या जाग्याची पळोवणी केली. ते उपरांत भोंवतणचे सीसीटीव्ही तपासलो तेन्ना ते बंद आशिल्ल्याचें कळ्ळें. देखून हल्लेखोर नेमको कोण आनी तांणे फारफेट कित्याक केलो हांचे कारण सोदपाचें आव्हान पुलिसां मुखार आसा.
मजगतीं, इंटरनॅट बिलां फारीक करूंक नाशिल्ल्यान सीसीटीव्ही बंद आसा असो आरोप थळाव्या लोकांनी केला.
युरी आलेमाव हांणी सरकाचेर केली टिका
आयज सकाळीं फोंडें बेतोड्यां जाल्ल्या फारफेट घडणुकेंतल्यान गोंयांतल्या कायदो आनी सुवेवस्था नश्ट जावपाचे वाटेर आसा हें परतून एक फावट स्पश्ट जाला. सुत्रां कडल्यान मेळिल्ले म्हायती प्रमाण ही घडणूक घडिल्ल्या जाग्याचे सीसीटीव्ही कॅमेरे काम करीनात अशी म्हायती मेळ्ळ्या. मुख्यमंत्री डॉ. प्रमोद सावंत हांच्या फुडारपणा खाला भाजपा सरकारान ‘इव्हेंट’चेर व्हड प्रमाणांत खर्च केल्ल्याचो हो परिणाम. हाका लागून गोंयकारांची सुरक्षा धोक्यांत आसा अशी विरोधी पक्षाचे फुडारी युरी आलेमाव हांणी प्रतिक्रिया दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
