भांगरभूंय | प्रतिनिधी
33 प्रवासी जखमी, 7 जाण गंभीर जखमी
भांगरभूंय I प्रतिनिधी
फोंडेंः अनमोड-मोल्यां शेनवारा सकाळीं प्रवासी बस रस्त्याचे कुशीच्या शेतांत उमथून कोसळून 33 प्रवासी जखमी जाले. जाल्यार तेच दिसा अनमोड घाटांत सकाळीं एका टेंपो अपघातांत चालक रमेश चिल्लापनी (41, तेलंगणा) हाका जाग्यारूच मरण आयलें.
बेतोड्यां प्रवासी बस रस्त्या कुशीक उमथून पडिल्ल्यान 33 प्रवासी जखमी जाले. हातूंत सुजाता नायक (55, निरंकाल) आनी अनिता गावडे (48, निरंकाल) ह्या दोगांक गंभीर दुखापत जाल्ल्यान फुडल्या उपचारा खातीर बांबोळे गोमॅकाँत व्हेल्यात.
अपघात प्रकरणांत फोंडें पुलिसांनी बस चालक गौतम रामा नायक (25, करमणें- किर्लपाल) हाचे आड गुन्यांव दाखल केला.
मेळिल्ले म्हायती प्रमाण, अनमोड घांटांत सकाळीं 6.20 वरांच्या सुमाराक येवपी टीएस 12 युसी 3194 क्रमांकाचो टेंपो तेलंगणांतल्यान पेडण्यां मोपा विमानतळार लोखंडाचे प्लेट्स घेवन वतालो. देंवतेचेर चालकाचे नियंत्रण सुटिल्ल्यान टेंपोचो रस्त्या कुशीक अाशिल्ल्या फातराक धपको बसलो. नेटाच्या धपक्यान टेंपोंत आशिल्ले लोखंडी प्लेट्स कॅबिनांत घुशिल्ल्यान चालकाक जाग्यारूच मरण आयलें.
हे विशींची म्हायती कुळें पुलिसांक मेळ्ळे उपरांत तांणी घडणूक सुवातेर धांव घेवन उजो पालोवपी दळाक हे विशीं कळीत केले.
निरिक्षक संजीव दळवी हांच्या मार्गदर्शना खाला उपनिरिक्षक अजय धुरी हांणी अपघाताचो पंचनामो केलो. तशेंच कूड बांबोळे गोमॅकाँत कुडी घरांत दवरल्या.
मजगतीं, बेतोड्यां प्रवासी बस रस्त्या कुशीच्या शेतांत कोसळून बशींतले सुमार 33 प्रवासी जखमी जाले. पुलिसांनी घडणूक सुवातेर धांव घेवन जखमींक उपचारा खातीर हॉस्पिटलांत दाखल केल्यात. ह्या अपघातांत कांय प्रवाशांचे हात फॅक्चर जाल्यात. अपघातांतल्या जखमीं मदीं 19 जाणांक मुळावे उपचार करून घरा धाडल्या. जाल्यार 7 गंभीर दुखापत जाल्ल्यांचेर उपजिल्हो हॉस्पिटलांत उपचार चालू आसात. अदीक गंभीर जाल्ल्या दोन प्रवाशांक बांबोळे गोमॅकाँत धाडल्या. बस अपघातांत बस चालक लेगीत जखमी जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
