भांगरभूंय | प्रतिनिधी
भांगराच्यो वस्ती; रोख 60 हजार फारायले
फोंडें: बेतोडें पंचायत वाठारांतल्या शिगणेव्हाळ हांगा रस्त्याचे कुशीक आशिल्ल्या नारायण गावडे हांच्या घरांत अनवळख्यांनी शेनवारा सांजवेळा अदमाशेक देड लाख रुपया मोलाच्यो भांगराच्यो वस्ती, तशेंच आलमारींत दवरिल्ले रोख 60 हजार रुपया फारायले. चोरी प्रकरणांत पुलिसांनी गुन्यांव नोंद केला. ताचे पयलीं लेगीत वाठारांत खूबश्यो चोरी जाल्यात. हे खातीर पुलिसांनी गस्त वाडोवपाची मागणी लोकां कडल्यान जायत आसा.
शिगणेव्हाळ हांगा शेनवारा सांजवेळा घरांत कोणूच नाशिल्ल्याचें पळोवन अनवळख्यांनी घराच्या मुखेल दाराचें कुलप मोडून घरांत प्रवेश केलो. घरांत आशिल्ले आलमारींतल्यो भांगराच्यो वस्ती, तशेंच घर कामा खातीर दवरिल्ले रोख 60 हजार रुपया फारायले.
घरांतले लोक सांजवेळा परतून आयले उपरांत चोरयेचो प्रकार उक्तडार आयलो. फोंडें पुलिसांनी घडणुकेचो पंचनामो करून गुन्यांव नोंद केला.
बेतोडें पंचायतीचे सरपंच मधू खांडेपारकार हांणी वाठारांत चोरयांचें प्रमाण फाटल्या कांय म्हयन्यां सावन वाडत आसा. विवीध देवळांनी तशेंच सरकारी विद्यालयांत हाचे पयली चोरयो जाल्यात. ताका लागून पुलिसांनी वाठारांत गस्त वाडोवपाची गरज आसा. निरंकाला फाटल्या शेनवारा बंद आशिल्ल्या घरांत चोरी जाली. पुलिसांनी चोरांक धरून कारवाय करपाची गरज आशिल्ल्याचें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
