भांगरभूंय | प्रतिनिधी
फोंडा : बेतोडें- बोरयेच्या बायपास रस्त्यार एका गव्यान गाडयेक नेटान धपको दिलो. हातूंत गाडयेच्या फुडल्या भागाचो चुरो जाल्ल्यान गाडयेचें बरेंच लुकसाण जालां. हातूंत ड्रायव्हराक कसलीच दुखापत जावंक ना.
हे विशीं मेळिल्ले म्हायती प्रमाण, संबंदीत गाडी वतना अचकीत एक गवो रस्त्यार आयलो आनी सरळ येवन गाडयेक धपको दिलो. ह्या धपक्यान गाडयेचें बॉनेट आनी इंजिनाचो भाग चेपलो. थळाव्या नागरिकांनी बेगोबेग घडणुके सुवातेर धांव घेतली आनी ड्रायव्हराक सुरक्षीत गाडये भायर काडलो. ह्या धपक्यान गवो जखमी जाल्ल्याची शक्यताय लक्षांत घेवन रान कर्मचार्यांनी वाठारांत सोद मोहीम सुरू केल्या.
ह्या बायपास रस्त्यार रातच्या वेळार बरोच काळोख आसता. स्ट्रीट लायट्स नाशिल्ल्यान रातच्या वेळार मुखारच्यान येवपी रानवटी जनावरां दिसनात. ह्या वाठारांत खुबशे फावटीं गवे अचकीत मुखेल रस्त्यार आयिल्ल्यान गाडयां खातीर हो रस्तो सामको धोक्याचो जाला. प्रशासनान हे समस्ये कडेन गंभीरपणान पळोवचें आनी रस्त्यावेल्या काळखाची समस्या बेगोबेग पयस करची, अशी मागणी थळावे करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
