भांगरभूंय | प्रतिनिधी
फोंडें: तळेवाडो आनी आशेवाडो ह्या दोन बेतोडें पंचायत वाठारांतल्या गांवांतल्या लोकांक दर वर्सा उदका खातीर वळवळे काडचें पडटात. तशेंच आशेवाड्या वयल्या गांवांतल्या लोकांक उदकाच्या टँकराचेर निंबून रावचें पडटा. तळेवाड्या वयल्या लोकांक एक दीस सोडून नळांतल्यान मर्यादीत वेळार उदकाची पुरवण जाता. उदकाची समस्या सोडोवपा खातीर कितेंय उपाय काडपाची मागणी थळावे नागरीक करतात.
आशेवाड्यार बिगर गोंयकार खूबशे प्रमाणांत वाडल्यात. भाड्याचे कुडींनी कामगार वर्ग रावतात. ताका लागून थळाव्यांक उदकाची समस्या जाणवता. देखून उदकाच्या टँकरांची वेवस्था केल्या. टँकरा वरवीं घरा मुखार दवरिल्लीं फक्त तीन बल्लां भरूनच उदक दितात. ताका लागून थळाव्यांक घरा मुखार रांकेन बल्लां दवरून तातूंत उदक भरचें पडटा.
मजगतीं, आशेवाड्या वयल्या लोकांक उदकाची पुरवण सुरळीत जावचे खातीर कांय म्हयन्यां आदीं बांदकाम खात्यान उदकाचीं पायपां उबारिल्लीं. मात त्या पायपांतल्यान कांय मेजक्याच जाणांक उदकाची पुरवण जाताली. हीं पायपां दिसाक फक्त दोन फावटीं सुरू दवरतात. ताका लागून हीं पायपां नांवां पुरतींच आसा अशी चर्चा गांवचे लोक करतात.
तळेवाड्यार थळाव्यांच्या नळांक एक दीस सोडून मर्यादीत वेळार उदकाची पुरवण जाता. मर्यादीत उदकाची पुरवण जाल्ल्यान थळावे तिडक उक्तायतात.
बांदकाम खात्यान बेतोडें पंचायत वाठारांतल्या लोकांक उदकाची पुरवण जावचे खातीर ओपा प्रकल्पांतल्यान उदकाचीं पायपां घातिल्लीं. मात त्या पायपांची जोडणी आशेवाडो आनी तळेवाड्या वयल्या गांवच्या लोकां खातीर करूंक नाशिल्ल्यान थळाव्यांनी तिडक उक्तायला. ह्या पायपांची जोडणी दोनूय गांवांक करची अशी मागणी लोक करतात. मात आजूनय बांदकाम खात्यान हे विशीं लक्ष दिवंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
