भांगरभूंय | प्रतिनिधी
पणजी : बेती, वेरें, बार्देसांत बनावट ‘कॉल सेंटर’ सुरू करून अमेरिकेंतल्या नागरिकांक लाखांनी रुपयांची तोपी घालपी एक रॅकेट साळगांव पुलिसांनी उक्तडार हाडलें. पुलिसांनी बेतींतल्या जॉयस पॅलेस हांगा घातिल्ले धाडींत ९ जाणांक अटक केली. हातूंत गुजरात, महाराष्ट्र, पश्चीम बंगाल, नागालँडच्या दुबावितांचो आसपाव आसा. अमेरिकेंतल्या नागरिकांची स लाखांची फटवणूक केल्ल्याचें उक्तडार आयलां.
अटक केल्ले दुबावीत संदीपकुमार प्रियदर्शी (अहमदाबाद, गुजरात), आकाश काळे (मुंबय, महाराष्ट्र), कवीश थारीवाला (अहमदाबाद, गुजरात), अक्षय नायर (ठाणे, महाराष्ट्र), हिरेन भयाणी (मालाड, पूर्व, महाराष्ट्र), अजय किशोर दास (कोलकाता, पश्चीम बंगाल), तन्मय पवार (कांदीवली, पूर्व मुंबय), विकीहो सोहे (दिमापुर, नागालँड), लहोशेटो रोचील (दिमापुर, नागालँड) ह्या तरणाट्यांचो आसपाव आसा.
बनावट ‘कॉल सेंटर’ सुरू करून अमेरिकेंतल्या नागरिकांची लॅपटॉप आनी खाजगी नेटवर्क वापरून सविस्तर म्हायती मेळयली. उपरांत अमेरिकेंतले बँकेचे अधिकारी आशिल्ल्याचें सांगून रीण दिवपाच्या आनी ऍपल सॉफ्टवॅर सहय्यक आशिल्ल्याचें सांगून अमेरिकेंतल्या नागरिकांक इलेक्ट्रॉनीक पद्धतीन गिफ्ट कार्ड वरवीं रक्कम भरपाकसांगून, उपरांत ते ती रक्कम भारतीय चलनांत काडून फटवणूक केली.
ह्या प्रकरणांत साळगांव पुलीस निरीक्षक दिनेश गडेकार हांणी कागाळ नोंद केले उपरांत गुन्यांव नोंद करून ९ जाणांक अटक केली.
#Goa #Betim #Verem #CallCenter #ScamNews
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
