भांगरभूंय | प्रतिनिधी
दुबावितांचेर आरोप निश्चीत
म्हापशें: बेतीं हांगासरल्या मालीम जेटीचेर अंकूश हनुमंत किरवे (48, सातारा, महाराष्ट्र) ह्या ट्रॉलर ऑपरेटराचो न्हंयेंत उडोवन बुडोवन खून केल्ल्या प्रकरणांत पांच दुबावितां आड म्हापशेंच्या अतिरिक्त जिल्हो सत्र न्यायालयान आरोप निश्चीत करपाचो आदेश दिला.
दुबावीत आरोपी इस्रील माथाईस उर्फ मातीयास सोयमुरून (झारखंड), रंजन उर्फ रंजया मैनू लाखरा (ओडिसा), बिनोद (झारखंड), दीपक उर्फ मोटू तुरतुंग भुईग (झारखंड) आनी बिनोद (ओडिसा) ह्या पांच जाणांचेर भादंसंच्या 143, 147, 148, 324, 302 आनी 201 कलमा खाला हा आरोप निश्चितीचो आदेश न्यायाधीश शर्मिला पाटील हांणी 20 वेर सुनावणे वेळार दिलो.
हो खुनाचो प्रकार फाटल्या 1 डिसेंबर 2021 दिसा मध्यान रातीं घडिल्लो. जाल्यार मयताची कूड 2 डिसेंबराक न्हंयेंत हुपतना सांपडिल्ली. नुस्तेमार ट्रॉलरा वयले खलाशी आशिल्ले आरोपी घडणुके वेळार जेटीर सोरो पियेताले.
त्या वेळार थंय मयत ट्रॉलर ऑपरेटर आयलो. दुबावितांनी ताचे कडेन सोऱ्याचे घुंवळेंत वाद घालो. ह्या वेळार मयतान दुबावीत इस्रील सोयमुरन हाच्या कानपटार फुलयलें तेन्ना सगल्या दुबावितांनी ताका धरलो नुस्तें दवरतात त्या प्लास्टिकाचें बॉक्स आनी कवचेच्या बाटल्यांनी मारपेट केली.
उपरांत दुबावितांनी मयताक जखमी अवस्थेंत मांडवी न्हंयेच्या पात्रांत बुडोवन मारपा हेतान धुकलून दिलो. मयताच्या नाकांत आनी तोंडांत उदक गेलें. ताका वाटावपा खातीर त्या वेळार जेटी वयल्या दुबावितांचे भिरांतेन कोणूच गेलो ना. उपरांत मयताक बुडून मरण आयलें. कूड उपरांत सकाळीं न्हंयेचे देगेर सांपडिल्ली.
ही घडणूक एका प्रत्यक्षदर्शी खलाशान पळयिल्ली. पूण तो दुसरे बोटीर न्हिदिल्लो आनी दुबावितांच्या बोवाळाक लागून तो न्हिदेंतल्यान उठिल्लो. ह्याच वेळार ही घडणूक घडिल्ली, आनी स दुबावितां पैकीं वयल्या पांच जाणांची वळख ताणें पटयिल्ली. घडणुके उपरांत पळ काडिल्ल्या दुबावितांचे चेरे जेटी वेल्या सीसीटीव्हींत बंदिस्त जाल्ले.
मरणा उपरांतचे तपासणी अहवालांत मयताक बुडून येवचें पयलीं ताचे कुडीचेर मारपेटीच्यो खुनो दिसून आयिल्ल्यो. ते प्रमाण तेन्नाचे पुलीस निरिक्षक निनाद देऊलकार हांच्या मार्गदर्शना खाला चवकशी केले उपरांत 4 डिसेंबर 2021 दिसा पर्वरी पुलिसांनी दुबावीत आरोपींक अटक केल्ली.
न्यायालयांत सरकारी पक्षा वतीन सरकारी वकील आर. डिसोझा हांणी जाल्यार दुबावितांचे वतीन अॅड. ए. चिखलीकार आनी अॅड. साळगांवकार हांणी युक्तिवाद केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
