बेतींत दोन दुकानांक उजो: सुमार साडे चार लाखांचें लुकसाण
भांगरभूंय | प्रतिनिधी
म्हापशें, प्रतिनिधी : बेती हांगा जनरल स्टोर आनी मोबायल स्टोर अशीं दोन दुकानांक उजो लागलो. हातूंत सुमार साडे चार लाखांचें लुकसाण जालें. पर्वरी उजो पालोवपी दळाच्या जवानांनी उजो नियंत्रणांत हाडून त्या स्टोरांच्या शेजारचीं हेर दुकानां वाटायलीं.
उजो लागपाची घडणूक तोटेश्वर देवळा लागसार मंगळारा घडली. पर्वरी उजो पालोवपी दळाच्या जवानांनी घडणुके सुवातेर वचून उदक आनी फोमाचो वापर करून उजो नियंत्रणांत हाडलो. तो मेरेन दोन दुकानांतलें सामान लासूप गोबोर जाल्लें.
ह्या उज्यांत सांपडिल्लें जनरल स्टोअर हें प्रमोद चोडणकार हाचें. तांचें देड लाखांचें लुकसाण जालें. जाल्यार मोबायल स्टोर धर्मराज नांवाचो व्यक्ती चलयतालो. तांचें सुमार ३ लाखांचें लुकसाण जालां.
हे घडणुके फाटलें कारण आजूनय कळूंक ना. मात हो उजो शॉर्ट सर्किटाक लागून लागिल्ल्याचो अदमास उक्तायला. उजो पालोवपी दळाचेे जवान सलीम शेख, निलेश गावडे, सुंदर राऊळ, सचिन गांवकार, रोहन सावंत आनी विधेश नायक हांणी उजो पालयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
