भांगरभूंय | प्रतिनिधी
कोयर वेवस्थापन, उदकाचें प्रदूशण, गुन्यांवांचे वाडीचेर जाली चर्चा
मडगांव, प्रतिनिधी : गांवच्या मेगा प्रकल्पांक जरी थळाव्यां कडल्यान विरोध जाता तरी पंचायत ते प्रकल्प बंद करपाक शकना, अशें बीडिओन सांगलें. उपरांत बेताळभाटीचे विशेश ग्रामसभेंत गोंयां खातीर नव्या प्रादेशीक आराखड्याची मागणी केली. विरोध आशिल्ल्या प्रकल्पां विशीं सरकाराक पत्र बरोवपाचें थारायलें. तशेंच कोयर वेवस्थापन, उदकाचें प्रदूशण, उदकाचो उणाव, गुन्यांवांत वाड ह्या प्रस्नांचेर ह्या वेळार चर्चा जाली.
बेताळभाटी पंचायत वाठारांतल्या मेगा प्रकल्पांक नागरिकांचो विरोध वाडटा. ताका लागून ग्रामस्थांचें मागणे प्रमाण पंचायती वतीन विशेश ग्रामसभेचें आयोजन केल्लें. राज्या भायले लोक गोंयांत येवन जमनी विकत घेतात आनी बांदकाम सुरू करून त्यो दुसर्या कोणाक विकतात आनी पयशे करतात हें चुकीचें. राज्यांतल्यो जमनी राखपाचें काम सरकाराचें. मात सरकारूच परवानगी दिता. ताका लागून जमीन विकपाचें प्रमाण खूब वाडलां, मेगा प्रकल्प वाडल्यात. हातूंत राज्याचें व्हडलें लुकसाण जाता. ताका लागून राज्य सरकार जमनी राखपा खातीर राज्या भायल्या लोकांक जमनी विकपा पसून आडावचें आनी तसो कायदो करचो, अशी मागणी थळाव्यांनी केली.
साश्टीची बीडिओ पल्लवी मिश्रा हांणी गांवांतले मेगा प्रकल्प पंचायतीक बंद करपाक मेळनात. हे खातीर थळावे स्वराज्य संस्थेक तितले अधिकार नाशिल्ल्याचें सांगलें. तेन्ना ग्रामस्थां कडल्यान गांवांतल्या मेगा प्रकल्पां विशीं पंचायती वतीन राज्य सरकाराक पत्र धाडचें. बेताळभाटी खातीर नवो प्रादेशीक आराखडो तयार करचो अशी मागणी करीत थाराव घेतलो.
मिकी पाशेको हांणी सांगलें, गांवांतल्या मेगा प्रकल्पांक थळाव्यांचो विरोध आसून लेगीत पंचायत ना हरकत दाखलो दिता. पंचायतीन मेगा प्रकल्पा आड कागाळ केल्यार ताची दखल घेवची. तशेंच थळाव्यांनी बेताळभाटी पंचायत वाठारांत जाय तितल्या उदकाची सुविधायो करच्यो, रस्त्यांची दुरुस्ती, कोयर वेळार उखलचो, मेगा प्रकल्पांच्यो परवानगे खातीर आयिल्ल्यो सगळ्यो फायली हे ग्रामसभे मुखार मंजुरी खातीर दवरच्यो, अणेंय तांणी सांगलें.
बेताळभाटी ग्रामसभेंत थळाव्यांनी ग्रामसभेचें आयोजन वेळार करिनात, इतिवृत्त वेळार सादर करिनात, ग्रामविकास समिती, जैवविविधताय समितींच्यो बसका जावंक ना…. हे विशीं कागाळी केल्यो. ताचेर बीडिओ पल्लवी हांणी पंचायत सचिवांची बसका घेवन फाटल्या दोन ते तीन ग्रामसभांचें इतिवृत्त सादर करपाक सांगलें. तशेंच कागाळ आसल्यार हो विशय खरपणान घेतले आनी फुडल्या ग्रामसभांचें नियोजन आतांच करतले, अशें स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
