भांगरभूंय | प्रतिनिधी
श्रेया धारगळकाराच्या वक्तव्याचो मुख्यमंत्र्यान केलो निशेद
पणजी, प्रतिनिधी : राज्यांतल्यो ज्यो एनजीओ बेजापसालदार वक्तव्यां करतात, टिके खातीर टिका करतात वा खंडणी उकळटात तांचेर कायद्या प्रमाण खर कारवाय करतले, अशी खर शिटकावणी मुख्यमंत्री डॉ. प्रमोद सावंत हांणी दिल्या. श्रेया धारगळकार हांच्या वक्तव्याचो हांव निशेद करता. ताचेर पुलिसांनी योग्य ती कारवाय केल्या, अशेंय तांणी सांगलें.
श्रेया हिणें देवी लयराईच्या धोंडाचेर वादग्रस्त वक्तव्य केल्लें. हे खातीर दिवचल पुलिसांनी तिका अटक केल्या. बुधवारा रातीं दिवचल पुलीस ठाण्याचेर भाविकांनी तिच्या अटकेची मागणी करीत गर्दी केल्ली.
कांय एनजीओ खऱ्यांनीच बरो वावर करतात. काय एनजीओ बेजापसालदार वक्तव्यां करतात. धर्मीक तेढ निर्माण करपी एनजीओंक थारो मेळचो ना. कागाळ आयली काय कायद्या प्रमाण कारवाय जातली. आतां कोणूय उठ्ठा आनी सोशल मिडिया वरवी बेजापसालदार वक्तव्यां करता. हांव देवी लयराई तशेंच शांतादुर्गेचो भावीक आसा. श्रेया हिचेर पुलिसांनी योग्य ती कारवाय केल्या, अशें डॉ. सावंत हांणी मुखार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
